人人都有童年回憶，阿明、龍仔、肥波、麗兒，就算係我都有。
阿明嘅童年係嗰部chok下chok下嘅超二精靈機，聽講佢有晚屙屎行雷，chok得起勁得濟，進化咗180分鐘都未有嘅祖頓獸，喺個馬桶道返返落海。
龍仔開學話入咗武當，聖誕就練緊先天氣功，復活節做咗八袋長老，暑假去埋嵩山做金粉餅㖭⋯不過一切都係喺金庸ONLINE裡面。唔知有無小李飛刀學呢？
肥波係個有錢少爺嚟，屋企可以有好多機械人模型同玩具，佢最鍾意一部叫凶鳥嘅高達。肥：「高你老母啊！笨大！」叫親佢高達都會被肥波訓話返個幾鐘。咁我無睇過係唔識分嘛⋯最新有部好似樣嘅叫艾斯拜因，唔知係唔係高達呢。
麗兒就最鍾意唱K，四、五個人喺加洲紅嘅時間分配直情係要用堅尼系數去計，不過當時我哋都未有咁多兩性平等嘅智慧，佢一句「LADY FIRST！」我哋就唔識駁。聽阿明佢哋講，直到奇拿閃卡面世後，只要擺出一罐黑鮑，就唔洗再「同學愛新鮮」啦。
我當年父母好前衛㗎，好早就識得要起好條起跑線。我個童年同今日啲死小孩一樣，唔係補習，就係興趣班。做唔晒功課同補充練習，就丟我上有閘有鎖有欄柵嘅上格床，做唔晒唔準瞓、釣魚就會拍響欄柵叫醒我。所以乜高達、武俠、精靈機、流行曲，我都唔太曉。
但我嘅童年回憶同最大嘅娛樂，係透過氣窗偷望隔離屋XX、同埋叔叔請我食嘅蕃茄肉丸。XX同我應該係同年，每次同XX雙目對望，我都感覺到佢熱切嘅視線同交流嘅慾望。但媽媽話我係未來社會嘅楝樑嚟，唔可以屈喺個咁細嘅公屋度；今日我屈喺呢個上格床嘅籠入面做功課，他朝一定可以龍穿鳯。所以直到隔離屋叔叔請我食咗一粒佢親手搓嘅蕃茄肉丸前，我都未無問過佢叫咩名。
今年我二十有多啦，讀書唔係叻，啱啱入唔到大學咁。咁條條大路通羅馬，咪試下搞啲生意仔。我諗過搞韓國化妝品，仲畀我遇到X兒。雖然佢有男朋友，但我同X兒一樣可以好似XX當年同叔叔咁做齊身體語言嘅交流。不過最近有啲手緊，咪問個就快結婚嘅朋友借啲老襯本救住命先囉。但佢急住追多兩追，我同X兒唔小心就請佢救命，變要咗佢條命。X兒買咗兩包水泥返嚟，釀起咗佢。噗嚕噗嚕，水泥石味之外，仲有一陣肉香，陣味好熟。
啊！喺細個隔離屋叔叔請我食嘅蕃茄肉丸嘅香沬。係喎，自肉丸嗰日之後，我都無見過XX。
