(圖片來源：GOOGLE，如有侵權請告知，我會將圖片刪除。）

相信大家細細個嘅時候都一定有種過綠豆同蠶豆。

記得以前讀幼稚園嘅時候，老師為左令我地認識植物，體驗一下大自然同生命力嘅奧妙同過程，就派左每人少少綠豆同一粒蠶豆比我地咁多個同學仔，叮囑我地要畫圖記住植物嘅成長過程，係一份好有趣嘅功課。

個陣我將綠豆同蠶豆小心翼翼咁用袋仔包住，放係書包暗格，迫不及待咁想快啲返屋企種。

記得個陣一返到屋企發現到我家姐同我一樣都有呢樣功課，我地問媽媽拎左兩個膠杯同棉花，然後落少少水，好小心咁將蠶豆放係中間，將綠豆圍住蠶豆，最後放左係窗台。

第二日起身，我同家姐立即去窗台一望，綠豆已經開始發芽，係腰身開始伸出一條白色，好似蟲仔嘅野，個陣我並無留意到家姐嘅表情。

到第四、五日，連蠶豆都已經發芽，同綠豆一樣條芽仔越生越長，更打起圈圈黎，個陣我發現到家姐係咁用手摸住手臂，近睇已經見到佢起曬雞皮。

當日子越黎越長，唔知係唔係因為我地準備種野嘅膠杯太細同陽光太猛關係，啲植物好似打交咁繞埋一齊，而綠豆種出嘅芽菜原本雪白色，但竟然開始發紫，而家姐見到後，臉色開始發青，更開始作嘔。

之後升上小學都有過幾次同樣嘅功課，家姐佢都唔理，將種野嘅功課都交比呀媽做，而自從個次種過綠豆同蠶豆後，佢唔再食芽菜… …

記得上次，我同家姐一齊去茶餐廳食飯個陣，我見佢挑曬芽菜出黎唔食，我就忍唔住笑：「仲記唔記得以前我地種過綠豆呀。」

家姐一聽到臉都青埋，好惡咁話我：「頂你！你唔好再提起呀！」

之後佢好嬲咁將所有芽菜夾去我個碗到。

「… …」

望住啲芽菜，諗返起種綠豆嘅過程，我都忍唔住打左個冷震。