唔知你地有無一啲鍾意食辣嘅朋友？而且呢啲朋友大部份都分為譚仔派同傷心派。每次大家聚埋一齊討論食咩，總會好似嘈交咁。
呀明係朋友中係聚會搞手，負責同各個朋友約好時間，同大家一齊諗食咩好。而係朋友當中佢有樣野好擔心，而且好驚。
你問驚咩？
每次呀明係Watsapp群組打完一句「想食咩？」佢總會好擔心May同呀智嘅回答，當其一個人答左一個經常出現嘅答案，事情就會展開，睇佢地對話好似有聲咁，隔住個電話mon都 feel到佢地嘈交。當佢地嘈緊個陣，所有人就唔會出聲，唔知係食緊花生定食緊爆谷。
呀明輸入左無耐，May好快就應機。
「近排好想食辣野，不如食傷心？好唔好？」打完呢句野仲要send個面紅emoji扮可愛。呀明見到May打完呢句野就開始冒汗，佢最擔心嘅事果然發生。
「食咩傷心，都唔好食！食辣野緊係去食譚仔啦！」呀智見到就九秒九覆左。
開始啦！開始啦！
呀智係一個不折不扣嘅譚仔忠實fans，而May係一個傷心fans，所以提親食辣野都會嘈交。May見到自己鍾意嘅傷心比人話，就好唔順氣，就開始反攻，唔知發咩神經咁係到寫一大段食評。
「食咩譚仔！緊係食傷心啦！薯粉軟、彈、Q，滑，配合酸辣同多種調味嘅湯底，係完美配合，口水雞麻辣程度啱啱好，雞肉軟滑，簡直令人一試難忘… …」
呀智亦都唔服輸，亦都寫起食評。
「譚仔酸辣米線，湯底可分十小辣，亦有四特辣，酸辣湯底香、麻、辣，再配上彈牙米線，簡直無得輸！」
May忽然好似代言人上身咁話：「傷心湯底酸到流口水 ，辣到流眼淚，更加拎過好多獎！」
「講到拎獎譚仔無得輸！」
唔知呀智痴左邊條線，忽然send左一段錄音，錄音入面呀智竟然譚仔呀姐上身，扮曬口音咁講：「痰仔呀jer太都千切，仲千切過禾老滿。」
見到佢地嘈得咁勁，各自擁護自己心水食店，呀明忽然好感慨，佢記得以為學生時代呀智曾經暗戀過May，唔知好彩定唔好彩，呀智最後放棄左對May嘅感情。原來世上最遠嘅距離唔係一個住小西灣，一個住元朗，而係兩個鍾意食辣嘅人一個鍾意食傷心，一個鍾意食譚仔。
眼見兩人不斷轟炸whatsapp，而其他人無停止佢地。身為搞手嘅呀明自覺要停止佢地，但呀明緊係撐兄弟呀智嫁啦！而且佢本來係另一派，但又唔想太過明顯就換過方式問：
「不如我地食三哥？」
