今日，我睇到一篇新聞話，啲家長將細路送出國讀書，有低齡化嘅現象，最細個只有八歲。
其實大家如果有睇我嘅文章，都知道我係一個留學生。我係一個加國某城市讀書嘅一個年輕人。我唔係想講係外國讀書有幾辛苦。我知道自己有機會係外國留學係一件好幸運嘅事，我亦好感恩。
我想探討嘅係，出國讀書對我有咩野影響。
當然啦，大家都知，出下國會擴闊視野。咁呢個我認同嘅。
我今日想講，壞影響。
我岩岩黎到加國，係18歲，係法律上算係成人。我岩岩黎到，好開心ga，外國新事物，周邊都好新奇。但一個月過後，我漸漸變得唔開心。身邊嘅朋友都係香港有新嘅大學生活。而自己係呢度，又無咩朋友。睇fb，見佢地有幾開心，參加咩咩活動影嘅相，我不禁好嫉妒。
本來我就係一個唔係好識控制情緒嘅人，當時我亦唔知點樣先可以抒發到自己嘅情緒。呀媽打黎同我傾計，每次都鬧交收場。係，我真係不孝，攞父母黎做發洩對象。更甚嘅係，我甚至攞一位好友黎做出氣袋，成日對佢大吵大鬧。最後佢頂唔順，從此無再理過我。記得當時，我每一日都超唔開心。晚晚就係度喊，都唔知自己喊咩。不過，就係呢啲經歷，最後令我成長左。
但無可否認，我已經唔係當初嘅我，我已經變左好多。
但試問一個八歲嘅細路，佢地心智都未成熟，就送佢地去外國。呢件係一件好事嗎？我想講，小朋友嘅經歷係好影響佢地將來嘅性格同行為。
點解我當時會成日同呀媽鬧交？呢個要由我好細個開始講起。話說當年移民潮，我呀媽亦黎左加國坐移民監。為左攞加籍，係加國住左好耐。而我，就係香港，比呀爸照顧。由我出世，到八歲為止，呀媽都係加國居住。有時候都會番下香港，不過真係好少會番黎。
大約三、四歲，我同祖母同呀媽一齊去商場行。然後我祖母行開左，得番我同呀媽一齊。你估下當時嘅我做左啲咩？無錯，就係喊，訓係地下度喊。十足十當左呀媽係陌生人一樣。周圍嘅人都望過黎。呢件事係呀媽親口同我講ga。
所以，我同呀媽之間，到而家，都總係有一道無形嘅牆。
細個嘅經歷，真係好影響一個人嘅成長。如果你想仔女接受外國式嘅教育，大可以送佢地去讀國際學校。太細個就自己去外國讀書，真係唔係一件好事。
就算係成人，有時候都未必承受得到。
而且，小朋友年幼無知，需要家長嘅教導，教佢地待人處事，教佢地做人嘅正確態度。最有效嘅教育，莫過於身教。如果你淨係單單靠把口講，小朋友可能只會當耳邊風。如果你連係佢地身邊都做唔到，佢地又點會肯將自己嘅心事，自己嘅想法，分享比你地呢？你又點樣去矯正佢地錯誤想法呢？淨係聽你把聲，訓話或者安慰幾句，就真係有效嗎？遠水不能救近火。細路總係會受身邊嘅朋輩影響最深。你係千里之外，又點知佢交左咩野朋友？
我真係好希望，家長們可以考慮清楚，先再決定。最起碼，都唔好八歲就送佢地出國呀。要同親友分開，真係一件難受嘅事。我自己亦經歷過…
不喜勿插，純粹想同大家分享自己嘅經歷。每個人都總有屬於佢地自己嘅故事。雖然我做錯好多事...令親人同好友唔開心...如果你地有睇的話，我想講，對不起！
如果大家想睇果單新聞，可以search「留英港生 低齡化8歲已出國」。
如果大家喜歡嘅我嘅文章，不妨係我嘅facebook專頁比我讚我。多謝大家支持。
