是咁的，今朝搭小巴，等車果陣有個型男排喺我後面， 
佢身型高大，衣着casual，但散發着一種型既味道，有種chill既感覺。 
佢行過黎排隊時，我見到佢有望我 (因為我都有望佢)

在漫長的廿分鐘等待，小巴終於來了 
上車後，車上有幾個位剩，車頭一個，我後面一個，隔離一個 
由於我隔離個位下面係車碌，如果坐入面就要屈住對腳， 
所以我覺得有得揀既都唔會揀坐呢個位。 
(我通常都想避免同人坐)

點知，型男竟然想坐我隔離! 
喺佢作出選擇的一刻，我地四目交投，幾秒對望，彷彿進行左無聲既溝通... 
"嗨，型仔"，"早晨，靚女"。 <-- 設計對白http://forum1.hkgolden.com/faces/clown.gif

佢行埋黎果下，我又驚又喜，呆左一秒先識俾個位佢行入黎坐 
當時，氣氛有少少尷尬。 
唔係我唔想讓，係我反應唔切，冇諗過佢會揀坐我隔離。

由於我完全被佢既氣場震懾，坐車途中都冇再進行直接的眼神交流， 
佢㩒佢既手機，我睇我既高登。我地兩人之間明顯隔着一條楚河漢界， 

怕羞的我唔敢坐得太近，而佢亦都好尊重規矩，並無過界。 
對於吸引既靚野，似乎大家都一致認同，只可遠觀不可褻玩。

不過， 
小巴司機一般的駕駛技術，幾次忽然既剎車，提醒我同佢唔好玩手機，仲要坐返好。 
途中不斷的大幅度搖晃，尤其係向右邊既急轉彎，我同型男既距離越來越近... 
終於，在旅程既2/3，我地既膊頭手臂互相觸碰了!

果一刻， 時間並無如戲劇中凝住，但我地既手卻靜止了。 
我輕輕的傍着他的肩膊，如果身體識對話，應該會係咁： 
"你件冷衫好柔軟啊" "你好溫暖喎" "咁我地加埋咪好溫柔" "哈哈" http://forum1.hkgolden.com/faces/clown.gif

當大家雙臂緊貼時，係可以互相感受到，對方每一個動作帶來既輕鬆震動。 
型男同我都好明白呢點，所以我地都盡量減少移動，即使小巴依然在行駛。

但有一樣野，大家都冇辦法停止， 
呼吸。

一開頭，佢同我都不約而同，有默契的減少呼吸。 
但慢慢，我發現佢呼吸由淺變得深。

我感受到佢胸口起伏帶來既震動，而每一下的震動， 
都傳入我既心，彷彿為我帶來心跳， 
而我，都無法制止我的深呼吸。

大家好清楚，深呼吸既背後原因， 

係大家既心跳加速，而要吸多些氧氣。

當車停低等紅綠燈時，車箱一片寂靜。對方加速呼吸帶來既震動， 
彷如沉實既bass drum，又好比屬於我地兩個之間既morse code。 
雖然環境既寂靜帶來一點尷尬，但大家並冇移開既意欲，繼續傾聽對方心聲。

就係咁，過左5分鐘。 
車又就快到站了，我地既交流亦將要完結。 
我雙手稍作移動，暗示即將落車， 
佢好像讀懂了我的意思，也把手移開，然後㩒手機。

曾經，我有希望佢同我同一個站落車， 
但只有一秒閃過呢個念頭，我好快就清醒過來。 
因為，即使一起落車又如何？ 
大家只會各行各路，畢竟都是陌路人。

呢程車，可以同呢位型男有緣一齊坐， 
無聲溝通一段時間，實在係好奇妙既遭遇。

雖然彼此只是萍水相逢， 
但都進行到咁高層次既交流，真係好難得。

小巴型男，有緣再見。 
或許見多幾次，我地會進行有聲的溝通。