最近又再開始多人談論移民問題, 話香港近年移民人數又回升. 當然係暗示香港唔多掂, 多左人想走啦…
其實講真又有咩好討論呢, 我地中國人對移民呢樣野一向都唔陌生, 我地一向係好習慣走來走去, 過住好似逃難咁既生活方式啦. 上一代人由內地走黎香港, 走去英美歐日韓古巴厄瓜多爾咩鬼國家都有, 攪到King Sir要走去偏遠既國度尋找他鄉的故事. 咁係有D人對自己既民族好有心, 就算身在他鄉, 都好鬼想去搵返自己既根源. 但係其實如果唔係自己失去左條根, 又做咩鬼野無啦啦要去尋呢? 咁點解有人會無啦啦失去左條根呢? 會唔會其實好多中國人都怕左自己民族既劣”根”性, 再頂唔順係自己人”管理”既土壤再生活下去, 於是把心一橫將自己同埋自己擁有既一切都連根拔起, 一走了之呢?…
友人Tom話: 唔係…買個保險, 俾條後路自己遮, 拎多本passport, 有咩事起黎都叫有兩手準備呀…
我話: 咁又係…有能力梗係做多手準備好啦, 喂, 你都見好多做”管理”既人都成日彈弓手, 出矛招, 呢頭明明出剪, 點之即刻彈弓手轉做包, 你冇多手準備,真係會俾佢一鑊橋起架.
Tom話: 咪係, 唔好講咩野領導人喇, 就自己打工既公司老闆都好鐘意彈弓手啦,你信佢會睇工作能力去升人? 佢講你又信? Peter仔咪係有實力俾人炒既例子囉,原因係咩? 冇埋堆囉, 佢都唔係老闆黨既人, 冇運行就係一定架啦…
所以話, 其實一般人, 特別係現代人, 咩事都應該有兩手準備, 對自己土生土長既地方又好, 對每日花上自己三份二時間既工作同埋公司都好, 都應該隋時準備要走佬. 唔係我地悲觀無情兼冷感, 係因為我地只係一粒鑼絲, 一隻棋子, 係唔應該有感情. 咁事實係喎, 一隻棋子俾人利用完既剩餘價值就只係”篤眼篤鼻”, 唔趕你走已經係皇恩浩蕩啦, 何況你作為一粒鑼絲, 明明係死物, 死物都識野, 識話唔開心?! 咪嚇人啦!
