唔知由幾時開始，我越嚟越憎食甜野，唔止雪糕、蛋糕、西瓜等，連加咗少少糖嘅龜苓膏都難以下咽，打開零食櫃，帶少少甜味嘅嘢都冇，究竟點解？明明以前雖然唔算好鍾意甜野，但係都未至於而家咁反感。
大家都話食多啲甜野會開心啲，但係當我打開一粒糖嘅包裝，見到嗰粒色澤泛白嘅牛奶糖，已經唔想將佢擺入個口，或者係糖嘅問題，搵另一粒，打開包裝撲鼻嘅人工提子味已經粗魯咁霸占咗我嘅鼻腔，㗳真啲，唔止甜到漏，仲夾雜住細個嗰陣嘅咳藥水味，粒糖漸漸融化，成個口都係嗰陣假到毆嘅味，唔單止冇少少愉快嘅情緒，更加係我個頭上面加咗一層陰雲⋯