呀一係一個稱職嘅打工仔,今日被老闆指點去小西灣送文件。送完之後,佢要返番去黃大仙嘅公司。佢見仲有些小時間,既唔想企,又費事咁轉接搭小巴去柴灣再轉地鐵,所以就搭巴士。行到巴士總站,咁啱有架106開始上客,於是就二話不説排隊上車。

新巴-車隊編號5070 車牌KC6983
10:00-小西灣藍灣半島 準時開車
呀一上咗車,即刻衝上樓上車頭,當佢行緊樓梯之際,司機鬆手掣開車。佢一仆一碌,差啲仆親。坐低之後呀一就較一較冷氣風口、戴住headphone、瞇埋雙眼,開始展開漫長嘅106車程。佢隱約聽到歡迎辭: 「櫈噔鄧燈~歡迎乘搭新巴106號線.....」

10:32-北角民新街、英皇道
呀一醒吓瞓吓,望下窗出面,原來架車仲喺北角。望一望錶,原來已經坐咗半粒鐘有多。另外佢仲發現行人路有唔少公公婆婆喺度燒衣紙。呢個時候咁啱架車去到大酒店門口,啲花牌多到擺出電車軌咁濟。呀一心諗:究竟今日咩日子呢?說時遲,那時快,架巴士已經去到下一站-健康村。呢個站人山人海,上咗好多人,八達通機嘅嘟嘟聲密到冇停過咁滯,淨係上客都上咗足足成個字。

10:45-炮台山站
呀一坐緊嘅106號巴士,由北角沿路去到炮台山一架車都冇。停紅燈嘅時候,呀一望望車窗外反射商業大廈外牆嘅玻璃窗,全車頂閘滿座。奇怪嘅係,健康村打後嘅站又冇人上落,唔講唔知仲以為係特快線添。

10:47-天后興發街、維多利亞公園
巴士徐徐駛到維多利亞公園,客鐘突然亮起。上層嘅乘客冇啦啦好似撞邪咁,面無血色一鍋鋒咁擁曬落車。同時間,有個頭髮濕濕、好 pure 好 true 嘅女仔上咗車,估計啱啱喺泳池游完水。佢坐喺樓上中後排左邊窗口位。

10:50-向九龍半島進發
「櫈噔鄧燈~下一站海底隧道收費廣場,香港理工大學,紅磡站」

眾所周知,平時不分晝夜,紅隧都係咁塞車,但係今日紅隧入口一反常態,居然一架車都冇,不過架車行得好慢。霎時間,車上嘅燈突然熄哂。入到隧道,架車慢到蟻躝咁。好奇嘅呀一透過潛望鏡望落去司機位,睇吓司機係咪瞓着咗。點知,佢見到司機位係冇人嘅,原來架車係處於無人駕駛狀態。而潛望鏡仲有隻曱甴飛出嚟添。

10:55-行程受阻
巴士喺隧道龜速自動行駛。行行吓「啲篤啲篤」嘅打燈聲響起,架車打起死火燈,然後架車自動停車並拉埋手制。呀一好驚撞鬼,於是佢手震震腳震震咁行去後面叫醒瞌緊眼瞓嘅女仔。

呀一:喂起身喇,架車上層得番我哋兩個咋。司機唔_見咗呀。而家架車唔_識郁啊。

女仔:定啲嚟,咁不如食啲嘢先啦,我好肚餓呀。

呀一:食你個死人頭呀,快啲落樓下睇吓點搞啦。

女仔:我想食乾炒牛河河河~河~河~

呀一:快_啲落嚟啦!仲嘈。

呢個時候,呀一同女仔行到落下層,發現人影都冇隻,報站機突然播出呀伯聲嘅聲響:「櫈噔鄧燈~下一站紅磡亂葬崗,揸緊扶手冇有怕啊!」

佢哋兩個聽到恐怖廣播之後個心都離一離,心諗冇事嘅。壞機啫,嚇佢哋唔到嘅。

11:00-食嘢喇
隧道入面一直都煙霧彌漫,間唔中有陣燒焦味飄入車內。呢個時候,車門響起「咯咯」嘅敲門聲。有個半透明嘅呀婆拖住個得番上半身嘅小朋友行埋嚟巴士前,呀一雖然驚,但佢知道「人怕鬼三分,鬼怕人七分」呢個道理,所以佢行前去開門畀呀婆同個半身細佬。

婆婆:靚仔靚女可唔可以俾啲嘢食我哋呀?

女仔: 我哋身上冇乜嘢食,不如俾包雪芳蛋糕你啦, 你要芒果味定朱古力味呀?

婆婆: 我唔係要呢啲呀,我哋要元寶蠟燭呀。

婆婆變咗啲衣紙、香、火機出嚟,擺咗喺呀一同女仔面前。而由於鬼魂唔能夠自己點火,於是就叫女仔燒畀佢哋。 -
婆婆:燒俾我哋吖,我哋好肚哦呀......

呀一同女仔用火點著啲衣紙同香之後,就扔出去畀婆婆同細佬。

11:15-深入虎穴
呀一有車牌,但係未揸過咁大架嘅巴士。 佢坐上司機位,睇下開唔開郁到架車。扣上安全帶,鬆開手制,踩踩油門,架車的確識郁。由於隧道內煙霧瀰漫,呀一啪着咗車頭高燈。沿路見到隧道周圍都有人喺度拜神燒衣紙.....

女仔:有怪莫怪...細路仔唔識世界......我路過㗎咋。

呀一:唔該借借...唔該借借...

11:18-「危險慎入」
前面有個貼滿符嘅大招牌寫著「危險慎入」,招牌下有道大閘,封住去路。呀一停車睇吓咩環境。四周逐漸變得清晰,之後一啲煙都冇。呀一同個女仔坐喺架巴士食啲蛋糕充一充饑。呢個時候,有個着西裝、冇五官嘅男人自己撳開門掣,上咗架巴士到。

西裝男:嚟到呢度,帶齊嘢啦?

呀一:帶咩嘢呀?

西裝男:睇你咁問,即係冇啦!唔緊要,跟我落車,慢慢行入嚟啦!

招牌前面嘅閘門慢慢開啟,恐怖得嚟又有啲神秘。

11:30-冥府銀行
穿越長長嘅隧道之後,見到大大隻字寫著「冥府銀行」,冥府銀行入面有兩條長龍排緊。兩條隊分別係財務部同支付部。全部排緊隊嘅「靈體」見到呀一同女仔,即刻跪哂

喺度拜呀一同女仔。呢個時候,佢哋終於明白要帶啲咩。

呀一:啊靚仔呀!我想要啲陰司紙、元寶。

西裝男:你見呢度煙都冇,都知唔俾燒嘢啦。

呀一:咁點?畀現金、八達通?

西裝男:地府科技發達,而且而家潮流興環保。攞你部電話出嚟吖。

呀一:冇網路連唔到綫.....

西裝男:俾wifi名你,名稱「西西油炸鬼」,密碼on9777。

女仔:入咗,而家點?

西裝男:有冇Wechat pay 或者Alipay呀?入咗去search 冥府就揾到我哋。

呀一:你哋要幾錢呀?

西裝男:初來路過......少少地十億啦。

11:50-交易完成
「叮噹!交易完成,以繳付十億給冥府銀行」,呀一同女仔手上多咗一張地府通行證,之後佢哋兩個瞬間轉移到啱先嗰架巴士入面。前面嘅閘門亦都慢慢開啟,前方嘅景色清晰可見,佢哋見到微弱嘅陽光,同時間都代表著返到正常人間嘅紅隧出口。

12:00-海底隧道收費廣場,香港理工大學,紅磡站
呀一將架巴士駛出咗隧道,沿途都冇人喺度燒衣紙,但係周圍都冇車冇人。呀一停咗架車喺海底隧道收費廣場巴士站。原來司機喺巴士站等番佢地,司機上返車。

呀一:你頭先死Q咗去邊?而家又同我出現返?

司機:唔好意思啊。我啱先急屎去咗廁所,而家上番車喇,我繼續開車。起飛!

12:15-世界殯儀館
「我哋已經到達終點站,請離開車廂。拜拜」
冷漠嘅廣播響起,彷彿來回地獄又折返人間。

司機:兩位聽到廣播仲唔落車?到總站喇。

呀一:啊叔。106點會喺紅磡做總站呀,你昆我呀?總站喺黃大仙喎。

司機:頂你!你落車睇吓路線牌,呢架邊鬼係106呀。106咩嚟㗎,食得㗎?

呀一同女仔落車睇一睇路線牌......

「地府專車」?!

落車嘅時候
呀一:「呀!仲未問你叫咩名㖭?我叫呀一。」

女仔:「我叫Rachel呀。」

佢哋兩個落車之後向有「人」嘅方向行,而「司機」已經消失無蹤。Rachel好鍾意花,佢入咗間「花花花店」。事頭婆問佢哋點嚟。

Rachel簡單咁講述從維多利亞公園分站上咗詭異嘅106號巴士,到經過幾番轉接嚟到地府嘅所見所聞畀事頭婆聽。

事頭婆:「佢死得咁慘,寂寞咪諗住搵吓人嚟陪佢囉。唉!」

Rachel:「啲後生又係嘅,戀愛大過天,自殺落嚟咪執煤炭屎囉。」

事頭婆:「咁佢都幾受大挫折嘅。本身釣到金龜喎。黃志安咁紅,鬼知同隻臭雞許心穎偷食喎。」

Rachel:「你又知嘅?」

事頭婆:「呢件爆事轟動全球,地府點會唔知喎。」

Rachel:「話時話。咁我哋而家點做?」

事頭婆:「難得一場嚟到,送扎花比你去祭陳姓陰魂。之後對面殯儀館搵啲南磨佬做場法事啦」

佢哋兩個急急腳行入去殯儀館內。

呀一:「唔該!我想打場齋做法事。」

和尚:「人類?係咪姓陳嗰隻陰魂帶你哋嚟㗎?」

Rachel:「正是如此。」

法師:「嘩佢係咁帶人落嚟唔係辦法喎!」

呀一:「頂!咁即係好多嚟過呢度?」

法師:「係呀!從上個禮拜開始,每日三次,每次兩個人。」

Rachel:「一場法事幾錢?」

法師:「你哋係正常人類,而且呢度係陰間。身為法師,我哋有責任安全地帶你哋離開地府,返回人間。換言之,我哋係中介。人間電視台都話咪俾錢中介,所以我哋唔會收你哋任何錢㗎。你哋而家去街口個間金拱門買個雙層巴士漢堡返嚟,死者食唔到個飽唔安樂。」

「 噹噹噹」法事開始

呀一同Rachel每人都要上注香,拜四角。

「 天靈靈,地靈靈」。南嘸佬喺度唸經「 婆你呀嚒彈彈波,你阿媽好大個囉」.......

陳姓陰魂好鍾意食雙層巴士漢堡,為咗送陳姓陰魂歸西,呀一同埋Rachel兩個要餵女仔個鬼魂食紅豆沙,再燒多架巴士祭品比佢。

正所謂「乾坤一開,三七氣流一轉」,南嘸佬破地獄步伐如食生菜,而且設備齊全。其實問心講句吖,啲師傅嘅舞步仲勁過啲Kpop呀!某著名韓國男團?廢嘅。淨係吹嗩呐(啲打)咁醒神嘅BGM已經贏晒九條街啦!

喺殯儀館瞓咗一晚,佢哋要送陳姓陰魂上山火化兼到黃埔墳場拜祭。你冇睇錯,我冇講錯,係火化啲靈魂。陰間嘅嘢我哋識枝香咩!

由於天氣太熱嘅關係,佢哋一班人決定使用陰間鐵路搭去黃埔站。廢語有云:

[古有陰間無人駕駛鐵路,今有垃圾有加冇減廢鐵]

戇戇哋嘅呀一無知得嚟又幾白痴,再食埋螺絲:

「 點解有地鐵嘅?一個人?一個鐘?收幾錢?」

和尚師傅寸佢:「 問題兒童你有冇讀過幼稚園?三歲細路都識Google啦。冇用過陰間Google唔好話你嚟過陰間!」

「陰間鐵路」-陰間Google搜尋

「陰間鐵路早於N年建成,貫穿陰間地府城市網絡。與人間港鐵一樣設有11條鐵路綫及輕鐵以及接駁巴士服務。陰間鐵路並不是計劃而建設,而是一些人間自殺而死的陰魂需到地府進行懲罰-執煤炭屎。「牠們」勤力工作,令地洞打通成一條條管道,因此順道安裝信號系統以作鐵路運輸之用。由於系統屬於公共交通義務建設,而且地府長期有人間孝子賢孫捐贈金錢、所需物品等,地府財政盈餘充足,因此這是免費服務...」

「黃埔,呢個係陰綠線嘅尾站,多謝乘搭陰間鐵路。」說時遲那時快,已經同黃埔say個hi。

呀一:「相信柒婆幾適合喺陰間搭地鐵,因為唔使用八達通過閘機呀!」

南嘸佬:「妖!你請到佢落嚟先算喇。」

行咗出地鐵站,Rachel直衝出馬路,原來佢住喺人間嘅黃埔花園,佢遠望自己單位係冇人嘅。但Rachel自己都知道呢度一定唔會係人間,所以更加知道冇可能係佢屋企。

之後佢哋一班人行都去黃埔著名地標-黃埔號,去Leon買啲嘢飲。

點知入到去黃埔號裏面,發現黃埔號入面並唔係日本某名牌百貨公司Leon,而係一個墳場同埋火葬場。火化靈魂就如燒空氣一樣,一燒-「卜」一聲就完。南嘸佬提佢哋行出去黃埔號嗰陣時唔好另轉頭望番黃埔號,表示一去冇回頭。唔係嘅話又招返啲陰魂返嚟。由於澄澄同Rachel因為係人嘅關係,佢哋要「循例」到每個墳墓拜祭。

呀一:「唔該借借,有怪莫怪,細路仔唔識世界。」

佢哋而家要做最後一個儀式:放炮仗。


註:地方政府陰部(簡稱地府)除允許殯儀業工作放炮仗外,其他機構均不准作出此違法行為。

啪啪啪嘅聲音充滿刺激嘅快感,幾秒就完。師傅喺啲工具度拎咗個明顯「陰間淘佬」淘返嚟嘅金盤出嚟。Rachel同澄澄輪流金盤洗手。佢哋兩個換件紅色衫沖一沖喜,然後再捽啲碌柚葉上身,成個拜魂儀式就到此結束。

Rachel同呀一而家要去黃埔巴士總站搭番嚟地府嗰架5070去返人間嘅海底隧道收費廣場。師傅提佢哋要搭返一程人間嘅106巴士之後要去積德同埋返到屋企要用碌柚葉沖涼。

「唔好上錯車呀!唔係狗巴呀!」為保安全,師傅送埋佢哋上車。有個義工以經喺駕駛室等緊接載佢哋。

「咦?個司機係!?L文!」呀一大嗌走音。

L文:「復仇者L盟4 入面我死咗吖嘛,得閒冇嘢做咪去揸吓巴士囉!」

「L文!小心甩尾呀!」「花花花店」事頭婆路過。

憑住L文超卓嘅駕駛技術,飛快咁穿梭冇人嘅陰間街道,到達人山人海嘅紅磡站巴士總站。眼見隧道入口照舊交通擠塞,時間仲係當日嘅早上11:00。換言之喺地府只係過咗一個鐘。佢哋兩個嘅手機漸漸收到網絡,Rachel電話響起來電鈴聲:

「一天一點 傷心過這一百數十晚,大概也夠我送我來回地獄又折返人間」

容祖兒首《心淡》真係夠晒貼切, 來回地獄又折返人間。

佢哋按師傅嘅指示行天橋過去對面往黃大仙嘅106巴士站繼續去黃大仙。

搭車途中Rachel突然大叫。

呀一:「你有咩問題?」

Rachel:「我冇問題,一個鐘,餓咗一個鐘。我好肚餓,想食乾炒牛河。」講完呢句之後,Rachel就昏迷咗喺張凳度。

半個鐘後報站機響起廣播:「我哋已經到達終點站,請離開車廂,拜拜。」佢哋即刻落車跑去茶餐廳食嘢。

「係呢?想問你攞電話號碼,話晒我哋一齊經歷過咁多事。」Rachel喺茶餐廳捷足先登,做咗呀一好想做嘅嘢。

呀一:「9876-5432,呀一!係呢,你喺呢頭返工㗎?我喺黃大仙中心做嘢㗎!」

Rachel:「咁啱嘅,我喺黃大仙中心上面公司返工㗎!」

呀一:「不如搵日出嚟遊轉106車河當聚下舊吖?」

Rachel:「好呀~」

呀一:「咁拜拜啦!下次再約出嚟遊車河啦!」