當年行入設計學校個陣，仲記得自己個種雄心壯志，同一班同學有著一種同祟高嘅理想！
個陣對呢個行頭真係充滿住幻想。
包括自己嘅設計一定有識欣賞，只要肯捱老闆同客會欣賞你，他朝有日，我個名就係一個品牌！
當然所有嘢都係幻想。
【折磨】
辛苦唔緊要，至少係錢同滿足感上，你都是旦比樣我。但我越接觸到呢個市場，我就知道，我最值錢嘅唔係我個腦，只係我隻手。
當花盡腦汁設計好，交比老闆，佢只會一個輕視眼光望住你嘅設計，然後將你個嘅設計改到天花龍鳳，究竟我設計定你設計？
個客見老闆修改好嘅版本，就佢會同你講，佢想要嘅效果。
（）＝心聲
客：我想個設計再醒目啲！
吹：（下？依家呢個好蠢咩？）
客：個字較到最大得唔得？
吹：（得……COVER哂成張圖都得）
客：嗯，不如你再改改佢。 呀，不如你再比多幾個設計我睇丫
吹：（可以！過多２年返黎睇丫）
客人係好有趣，佢唔識設計所以想搵你做設計，但佢係唔需要你設計，佢只係需要你用軟件幫佢嘅設計製作出黎。
情況同一位音樂家每日都去Ｋ房到幫客人彈Ｋ歌一撚樣。
唔該，幫我彈首阮民安：踩唔死我 丫!!! 咩話？唔識？你唔係音樂家黎嘅咩？
【輕視】
正如我話，返工得唔到滿足感囉，咁你起碼比返多啲錢我丫。
但正所謂十個設計九個閉翳，設計呢種人總係比人輕視。
早兩日同位現職設計師呀爆傾計，人如其名一講就爆：
「屌你老母，唔好同我講咁撚多廢話，你話攝影拍片個類都比人壓價？我地呢種做平面設計嘅比人壓得仲勁！
你拎部機出去，個套裝都起碼十皮八皮啦！啲人戇鳩架咋，一睇就覺得你值錢！
我地？畫個圖之麻，使幾多錢姐？
你去做麵包，人地收到你個包，都會唔好意思話比返錢你；我做咁撚耐，我從來未見過一個人收到設計後，會話唔好意思比返錢你架！」
【後記】
依家又有一大班後生仔準備讀書或者做嘢，希望除左帶住理想之外都最好望下市場發生咩事，比自己一個心理準備。
言而，呢位咁火爆嘅設計師到依家仍然醉心係自己嘅事業上，我真係好尊敬佢。
大家有時間就關心下自己身邊做設計嘅朋友，因為佢地真係好大壓力架！
