結婚走數呢單野，為咗唔好根車太貼又想抽下水，等件事未水落石出仲有討論價值之前，理性D分析下單野。係討論/舌戰嘅過程中，睇到唔同人嘅討論嘅態度，原來真係好不可理喻⋯⋯

支持化妝師，唔洗再比咩証句出嚟，因為網上太多，當然吹水呃Like嘅都唔少，扮到自己有料爆就一直無再出聲。但真係要隔離啲吹水post，自己分析返D理據係咪充分。

支持新人及兄弟姊妹，其實唔係無佢地嘅証明，但一人一段，事實就越講越亂，無咩綜合到嘅結論出嚟比人個真相係點。

有支持新人嘅人話自己唔明點解化妝師收咁貴，又覺得佢比人走數就預咗，但提出論點嘅人又會戴頭盔話自己唔熟化妝呢一行。

仲有第一日嘅姊妹團，衝出嚟幫新人當箭反擊，但又用啲以為可以說服到人嘅証明嚟講，例如長期工作下唔應機有hea係梳化到休息嘅表現，嚟得化妝就係要做Show咁，係客戶面前表演出一百分。

之後又引申話長時間18個鐘，唔得就出聲、工作包埋、佢自己手寫改單。咁呢個情況可以用裝修嘅情況嚟比較，佢完咗工程，你唔滿意你可以走佢數，咁咪報警解決囉，呢一點都攪得好清楚，最後化妝師都追返，既然已經息事寧人，點解化妝師又要攪大佢？

又有人會質疑一對新人唔敢攪大件事，所以唔會慳返個少少錢，但又唔諗下Freelance客路有幾窄，何況做生意更係想息事寧人，攪大佢嘅話，將來結婚嘅人十個有九個都唔想搵呢種化妝師啦（廢事麻煩），咁嘅情況佢咪更加唔想攪大件事？

而另一件事，攝影公司根本就應該無任何利益，但見到自己嘅生意比人公審，又被人攪埋一份，如果唔係應該唔會衝出嚟扮中立。

當然仲有好多合約、比硬野、警察理唔到、態度惡劣（呢個Point係最反感，十個有九個客唔滿意時就一定用呢啲個人觀點又無point去嘈），雖然話今晚1800後會有人爆料，當日指拍咗片，目的係要佢地自首道歉，但如果佢地堅持，一樣可以有說法話佢地無問題（七警段片都可以話唔係証據，呢個世界仲有咩可以係証據），但正正呢一點我係好想講下。

點解可以咁盲目去反駁，明明無証據係手，一係就掉啲野出嚟自圓其說，一係就話唔信任何証據，咁就推翻哂之前大家嘅討論（好典型藍絲嘅做法，利益不在自己就咩都唔理，呢種人生存係理性嘅香港，係一件好可怕嘅事，重要有份投票）。

佢地呢班人，係扭曲哂一直以嚟討論嘅意義，佢地只係要人支持、唔係要共識，呢一點先係分裂香港嘅重點。

我都知好似吹大咗，因為睇我寫文嘅人，一開始都只係想搵花生位，點會吹到香港政治，覺得係諗多咗。

但生活嘅細節係形成社會嘅氣氛，今日有花生爆咗一班盲的支持新人嘅「網友」、亦有人有借機會想出位嘅「知名人士」，大家都係咁攪亂件事，要迫人支持自己而拒絕討論。

將件事套用返係「七警案」身上，佢地重要有利益添，比呢班咁盲嘅人去攪亂香港，香港點會唔死？