同屋主剛於今天撤離回港，剩下寬敞的空間教人落得愜意的同時，卻又有點清閒得百無聊賴，於是，我又從冰箱內拿出了方包來吹吹水，以解冬日午後的一席寂寥。然後，我們沒緣故地，竟碰上了一道解不開的數學難題。
我：喂，包哥，有條數我計左十幾年都唔係好知點計，一齊研究下呀？（對，現在我們已親暱得稱兄道弟的了。）
包：嘩，數學我唔掂㗎喎，不過見你無嘢做，即管同你玩下喇。
我：就咁，我有兩個朋友都係住西環嘅，咁有好幾次我地三個喺銅鑼灣威完，就諗住一齊搭的士返屋企喇，之但係我地點計都計唔掂條的士數點除。
包：吓？咁咪總數除三囉，有幾難呀？
我：梗係唔係喇，咁我落先㗎嘛，住得近啲梗係應該俾少啲喇。
包：唔... …咁呀，咁邊個落車，個錶係幾多咪俾幾多囉。
我：咁最尾落車果個咪唔駛俾仲有袋？
包：咁點呀？
我：我就係唔知先問你！嗱，我就咁諗過嘅，應該先將起錶除三份，之後，落車果個就要俾個刻個錶嘅錢減咗起錶個數，舉個例，我落車係$30蚊，咁就俾$8，再加$7.3，即係$15.3。
包：哦，咁幾好呀，就咁囉。
我：之但係，計落又唔對路喎，如果第二條友落車係$46，咁佢就應該俾$24再加$7.3喇，即係$31.3。最後條友落車係$60，咁就要俾$38加$7.3，即係$45.3。加加埋埋條數成$90.9，拆唔掂呀。
包：咁不如試下將$60除三，一人俾$20，幾好計呀。
我：梗係唔得喇，咁唔公平喎，的士又叫咩呀？計程車嘛，梗係要計路程嚟俾錢架喇。
包：你地三個好唔熟㗎？
我：唔係呀，好熟㗎，都識左十幾年㗎喇，仲差唔多晚晚見。
包：妖！咁就咪鬼計到咁足喇！
我：就係熟先要計得足，你有幾可同啲唔熟嘅人計到足㗎？就係熟先唔駛客氣，先要計足嘛！
包：哦... … 咦？都夜喇喎，其實大家又唔係話咁熟，不如放過我，隊返我入雪櫃喇，唔該晒呀大佬。（對，我們現在真的親暱得以兄弟相稱的。）
最後，我放過了方包，把它再次「隊」入了冰箱，然後，便繼續思索那道纏繞了我十年有多的數學題。
望著那人去樓空的客廳苦惱沈思之際，突然想起，同屋主還欠下我昨天£1.39的啤酒錢。
立時，我拿起了手機向他發了一個追債的訊息。
頭盔後記：
是有種數，因為太難而不會計，然而，
也有種數，因為太熟而不會計，那叫作「咁熟無計」。
你們懂的，在心中，Bromance！
另外，文中那條的士數，真心不懂計，求賜教。
