香城青年誌 噪音篇 （1）你好撚嘈呀
係你人生入邊有無怨恨過自己嘅出身？
可能係讀小學嘅時候坐你隔黎位個肥仔多零用錢過你，佢可以落樓下小食部買野食，
但你就要捱餓等到午膳，
佢仲過份到耐唔耐就串鳩你屋企窮拎下優越感。
又或者讀中學嘅時候你考衰左中學文憑試，
你個同學又考衰左文憑試，
但同學屋企有錢供佢出國讀書，
讀唔掂個時仲有人課金比佢續命重考。
你都可以重考，
不過係重考文憑試或者直接出社會捱世界。
就算幾努力幾懂事嘅後生仔，
佢都在所難免會去思考
“點解人地屋企咁好，我得啲閪野？”呢個問題。
我個名叫尹公度，
讀音可以係量度個度，
又可以係公道個道，你喜啦。
我細個問過我老豆究竟係讀咩音，
佢話公道個道，希望我追求公義，
受到委屈嘅時候勇敢為自己發聲。
當時聽到覺得好感動，
原來自己個名改得咁有意義。
大個左就諗，自己唔會做呢啲笨柒野。
我都問過阿媽，我個名到底點讀？
佢話讀量度個度，
希望我做咩之前都諗過度過，三思而後行。
我大個諗返就屌左聲，
你地兩公婆可唔可以夾下口供？
我尹公度對我出身家庭出身最大嘅怨恨就係，
點解我無一個好似桜もこ（KAWD-884）咁靚，可以比我近親相.....咳咳......
我尹公度對我出身家庭出身最大嘅怨恨就係要由我細個講起.....
當時我仲係同阿哥一間房訓，
當然係分開兩張床啦，
但又唔係最傳統個隻上下格床。
即使過左咁多年，我仍然無辦法忘記當晚嘅事，
我訓訓下比個痴線阿哥用枕頭打醒左，
我望撚住佢，如果早知道男的也會被性侵，
咁我一定會更加保護自己。
唔係個回事啦，
當年仲係傻校長食橙皮同明白了計算可變簡單嘅本土時代，傑哥不要呢啲外國勢力仲未掘起。
我阿哥打醒左我之後咁講左句
：「到我訓啦屌！你啲鼻鼾聲好撚嘈呀。」
我細個嚇到仆街，成晚眼光光等天光。
第二日同老豆講左呢單野，
佢決定係屋企間房比我。
就係咁，
我享受住自己一間房嘅優質睡眠直至出社會做野，我先發現呢個家族嘅人訓唔好就會嬲鳩。
香城青年誌 噪音篇（1）完
香城青年誌 噪音篇 （2）退休生活
今日我尹公度打左份牛工三年都比人炒撚左，
公司話新型流感疫情嚴重所以要減人手，
我講左句乜撚新型流感？即係武漢肺炎？
可能就係呢句得罪左個愛國愛黨嘅老細，
就算係我呢種做開幾個人工作量嘅自由打手都比佢拎黎開刀，
今鋪真係厲害了，我的國！感謝黨！
無左份夜更閪工都係好事黎，
我終於有時間可以打返之前儲落堆遊戲
，今年已經二零二零年了！
我連《生化危機柒》都未撚玩呀！
家下可以享受退休生活，訓到自然醒了！
仲可以日日匿埋係屋企打機，打到不見天日。
唔洗驚比班成日返大陸叫雞同食海底撈嘅廢中廢老同事傳染了！
我嘅計劃應該係咁，點解結果會變成咁樣？
出社會之後第一次有時間瘋狂打機，
有左訓到自然醒嘅機會。
兩種快樂重疊係一齊，我應該會好開心先啱架？
為什麼最後會變成這樣呢？
我間房窗出邊對撚住條渠，條渠好似條河咁大。
有時會傳黎農場啲豬屎味，
無味個時條河啲水混濁到仆街，望到都覺得臭。
呢區嘅邨民都叫呢個位做臭河，
就係我開展自宅警備隊生活嘅第一個早上，
我比人嘈撚醒左。
我望出窗睇下係邊撚個仆街早上十一點幾係到嘈撚住曬？
結果係臭河對岸發現有個阿叔拎住咪再開行音箱唱歌，我關撚住窗都係聽得好撚清楚，
聽得好撚清楚但聽唔明佢唱乜鳩。
好似哭喪破地獄咁嘅魔音，
除左填海華首《我們都是中國人》之外一個字都聽唔明。
可能街坊消遣娛樂下，一次半次唔好計較啦，
跟住我無理到佢，牙都唔刷住就瘋狂開始打機。
第二日同樣歌聲叫醒左我，我都覺得算啦唉。
大家日日匿埋係屋企防疫，壓力都大嘅。
日子慢慢咁過去，情況持續左兩個月。
我今日又醒左，鬧鐘都唔洗較。
感覺到有種衝動，唔係晨勃，係我體內嘅真火。
我內心嘅岩漿已經準備好噴出黎了。
我打開窗望去臭河對岸，
係同樣熟悉嘅身影，佢今日著左白色衫呀，
一樣企係政府用鐵絲網圍撚住嘅禁止進入區域到唱歌，
唱嘅都係個幾首魔音。
就算係啱啱落完雨，個地下仲係濕濕地，
佢都風雨不改，努力不懈咁堅持住呀。
我真係好佩服佢呀，
我希望佢知道有一個聽眾係默默咁支持住佢架。
我拉開左個窗花伸左上半身出去，
小朋友切勿模仿，我受過專業訓練。
我深呼吸之後大叫左聲：
「對邊河條廢老可唔可以唔好撚唱歌呀？
好撚柒嘈呀，屌你老母！」
之後我縮返入房，嘩，
我尹公度頭先嘅表現簡直就好似當年長坂之戰，張飛喝退百萬曹軍咁有氣勢。
我以為係咁有氣勢，
條廢老都係繼續唱得好開心。
可能老人家聽力退化，我決定再叫多次。
好似魏延咁大叫誰敢殺我！
同樣嘅呼喊，我嘅聲音都無辦法傳達到對岸。
山不轉路轉，可以架話我都唔想用個個方法....
香城青年誌 噪音篇 （2）完
香城青年誌 噪音篇 （3）政治手段
前排區議員選舉，
我住個區做左兩三屆嘅隱性工聯會議員廢老終於輸撚左，當時開心到想去佢面前扮《選戰》嘅廖啟智，指撚住議員廢老個半禿頭大罵一聲
：「廢物！你下馬天經地義！」。
我搵左搵區議員辦事處個電話，
好似打比鍾意嘅女仔咁有少少緊張仔，
估唔到有一日我要動用到政治嘅力量。
電話響左幾下，咁都正常嘅，
疫情期間又派酒精又派口罩之類一定忙架啦。
個電話再響幾下之後終於通左。
「喂，你好呀，我姓尹架，
就係（消音）區（消音多次）嘅居民黎。
有少困擾希望你地可以幫下手。」
「尹先生你好呀。
我姓高嘅，係辦事處嘅主任，
有咩可以幫到你呢。」
「咁每日大概十一點左右就會聽到有人好大聲唱歌，咁個位置呢就係....」
「係咪臭河個邊呀？」
（嘩屌，唔通佢地個辦事處係地下都聽到？）
「係呀....」
「其實我地都收到好多投訴架啦，
但臭河個邊就唔屬於我地嘅管轄範圍嘅。」
（屌呀，唔通政治嘅力量都吹個阿叔唔漲！？
比人嘈醒個下真係好撚柒辛苦呀，
唔通唯一嘅救贖就係搵黃金聖鬥士處女座沙加對住我用天舞寶輪嘅五感剝奪，奪去我嘅聽覺，
我先可以訓到自然醒？）
高主任係呢個位停左停，
好似feel到我失望又講多幾句。
「但係我地每次收到投訴呢都會聯絡警民關係組，睇下佢地會唔會派人去處理下，
咁因為佢地唱個時間唔係個管制時段，
所以我地只能盡力而為。」
「另外呢，
星期日下午四五點左右都有班人唱歌再大聲啲嘅，有無辦法處理埋？
要求佢地音量細聲啲都做唔到？」
「我諗佢地唔會細聲啲啦....」
「咁麻煩曬高主任了，拜拜」
傾到呢到發現再落去都無意思，我就收左線。
路不轉山轉，可以架話，我都唔想用個招呀。
唔通我要等呢區新增臭河選區嘅時候參選先可以光復到？
但我讀唔成書又蠢都係唔好做代議士好了。
與其等班忠誠勇毅得閒有心情架話，
不如我落去爆鳩歌唱廢老個音箱仲好啦。
忠誠勇毅根本無制裁真正邪惡嘅決心。
為左奪回我寧靜嘅藍天，
申張正義係無法假手於人架！
香城青年誌 噪音篇 （4）正面衝突
我又比廢老嘅魔音嘈醒左，
一次又一次咁重複經歷睡眠質素低下嘅痛苦。
我知道要結束呢個循環得一個方法，
我打開櫃桶，
入邊有鎚、士巴拿、剪刀同一盒口罩。
應該點樣幫個廢老黎一場震撼教育呢？
當年成功cut有線都係建基一位無名英雄嘅犧牲。
我最後三樣武器都無帶出去，
係櫃桶到拎左個口罩戴住就落左樓衝去對邊岸。
講下姐，唔通真係爆佢音箱咩。
啲廢老好鍾意叫人打鳩佢，
身體又唔撚係好，腰又企唔直，眼又擘唔撚大，一陣食我第一神拳就原地瘁死個下點撚樣贏呀？
我個名叫尹公度，
注定係個要為不公義發聲嘅青年。
我同個廢老只係隔住一個鐵絲網 ，
背撚住我全力歌唱，無察覺到有人準備背刺佢。
我來回踱步，諗緊點出聲好，
同埋見到隔黎有三個撚緊疑似受管制嘅鐵鏈狀武器嘅習武型廢老，可能係廢老嘅同黨或者保鏢。
我個名叫尹公度，做野要諗過度過，
雙拳難敵四手，此時不宜硬碰。
我諗住走，大人不記小人過。
突然個廢老唱到我們都是中國人！
佢個樣好投入，好享受，我睇到無名火起。
我企正佢後邊，
個樣擺到好似《絕命毒師》個白華特老師咁嘅嬲鳩樣。
「先生，你唱歌可唔可以細聲啲？」
歌唱廢老好唔耐煩，
習武廢老三人眾都停左手望住我。
歌唱廢老㩒停個音箱，拎住支咪望過黎。
「咩大聲呀，家下幾點呀？」
廢老拋返我，但我已經唔係以前嘅我了。
我唔到係個怕事嘅小朋友。
廢老必須被毀滅，正義會得到彰顯。
「你想知幾撚大聲呀，
我係屋企關撚住窗都聽到你唱歌呀，
你要唔要睇下段片呀？
我錄低左喎，唱歌咪唱歌囉做乜鳩要用咪唱呀？好撚多街坊投訴你架啦，
唔信打去區議員辦事處問下呀？
洗唔洗我都帶個音箱同咪落黎一齊唱呀？
黎明來到！要光復這....」
我講嘅時候係咁搖個鐵絲網，
好似你睇啲監獄或者喪屍電影咁。
「唔好意思呀細佬，我會注意架啦
喂喂喂，咁樣大唔大聲呀？」
歌唱廢老終於肯較下個音箱。
「你係好撚細聲都會傳去啲高位到呀仆街，
咪撚過幾日又較返大聲呀，
唔好要我再落黎呀。」
跟住我拂袖而去，嘩，
成個畫面好似白老師第一季整爆個乞人憎有錢佬架車咁型。
香城青年誌 噪音篇 （4） 完
香城青年誌 噪音篇 （5）出身
我又起左身，睇一睇電話。
咩呀？竟然訓到去十二點！？
我竟然無比個廢老嘈醒，
我終於用自己嘅手奪回呢區嘅寧願。
我忍左兩個月終於都可以訓到自然醒，
真係好開心，覺得唔只我一個人受惠。
我再望出窗，
無左個啲廢老魔音之後，
原來個景係咁撚靚架。
係萬里無雲嘅蔚藍天空呀，
連出邊條臭河都清澈到好似天空之鏡咁靚呀射喲。
三日後我又因為歌聲嚇醒左，
今次唔係歌唱廢老，啲歌我聽得明。
分別係《小蘋果》、《祝福你》同《皇后大道東》，三首不停循環。
我屌呀，《皇后大道東》可以算，
五年前大陸興緊嘅《小蘋果》都仲播？
仆街呀，個啲劣質文化咪撚入侵香港啦，
知唔知香港人有幾努力對抗《野狼disco》呀頂。
我又拉開窗花，望落樓下公園。
有個大媽一路擋歌一路跳廣場舞，
時間早過歌唱廢老，大聲過歌唱廢老。
近撚到我係個單位到跳出街再落下攻擊就可以直取廣場舞大媽嘅首級。
屌呀，幾年前都見過廣場大媽架啦，
佢地究竟跳乜撚野樣先可以一直維持到咁肥嘅身形？定廣場舞係越跳越肥？
咁不如咪撚跳啦，點跳都唔會變鄭多燕架啦！
跳咪跳囉，做咩要大聲播歌擾民呀？
新嘅敵人出現左，但口罩已經所餘無幾。
我就好似暮年英雄咁有心無力，
只好用枕頭蓋撚住個頭先勉強訓到，
隔一段時間又被嘈醒。
吓，唔通係歌唱廢老強勢回歸？
聽真啲發現唔撚係，
唔知乜鳩雀係我樓下係咁叫，完全訓唔到。
做乜鳩呀？連大自然都唔比我訓到自然醒？
世界點解會係呢啲方向先咁團結，
我係張床到輾轉反側，好撚想訓覺。
我忘記左今日係星期日，
仲有最大嘅敵人，臭河天橋底老人合唱團。
合唱團一樣唱啲我未撚出世就存在嘅金曲，
仲要有男女合唱，
音量係歌唱廢老，廣場舞大媽嘅總和。
我懷疑佢地聯合匯演緊。
最後我放棄左訓覺，
人生就好似《龍珠》咁，悟空打完菲利，
仲有斯路同布歐。
打完布歐仲有《龍珠超》，敵人一個個咁出現，
人生就係咁樣輪迴，不停咁經歷永劫。
我頂撚住兩個可比安安同佳佳嘅黑眼圈，
戴住耳機開最到大聲咁播音樂，
寧願聽最愛嘅歌聲而聾，
都唔想聽多一秒啲廢老魔音。
我尹公度對出身家庭最大嘅怨恨就係做乜鳩屋企個單位咁撚矮？我只係想好好訓覺咋，屌！
香城青年誌 噪音篇 全篇完
