《在廿八樓入lift後出唔返黎》

【一】

已經有一小時零三十秒了。

這是我生命中的第一次,沒想到我的第一次居然可以那麼持久……

我真的沒有這種經驗,所以我一開頭都是按阿媽教導的常識去做,但我唔知我以下所做的程序對不對?

據說,當困lift的時候,按了黃色嗰粒緊急呼叫鈕後,升降機上方的警鈴會響。

但響鈴沒有響,我相信的東西沒有預期發生,不知道是不是我搞錯了什麼,搞錯了自己的期望……

據說,如果按了黃色嗰粒緊急呼叫鈕後,就可以對住對講機喊救命然後會有人回應。

但對講機維持了一小時的沉默,連沙沙聲都唔回給我,就好似我最近不停Whatsapp嗰個女仔咁,可能我真的弄錯了什麼,誤會了什麼……

講真……如果不是因為我已經被困了良久,我才不會質疑自己會唔會係做錯了困lift處理步驟,搞到而家都仲未有人拯救我。

不過,積極點和消極點去諗件事,這部lift可能真的故障得非常徹底?連用後備電源維持電力的緊急設備都故障了……

我試過不斷拍打電梯門板大叫救命。
我試過用盡吃奶的力想撐開電梯門。
我試過把所有電梯控制板裡的鍵都瘋狂按了一百遍。
我試過對住電梯上角的閉路電視鏡頭不斷揮手還要大叫。
我試過跳,連續跳了二十下,但我不知道意義何在。

我試過,我真的試過。

一小時零半個鐘了。

這裡很安靜,只有lift頂上抽氣扇的轉動聲……

其實……其實咁的,
令我最擔驚的,不是我已經被困了超過一小時還未出到去這個現實,即使我再被困多一小時,如果我心裡鐵定總會有人在我餓死和渴死前撐開呢道lift門,我的心一定踏實得多,只不過係時間問題,只不過要等耐一點而已。

但事實係……我懷疑自己將會永遠被困。

係,永遠。

我有咁的推測不是因為我身在荒無偏遠無保安無人流的工廈升降機內,相反,這裡是我所居住的大廈升降機,人流鼎盛。

大廈二十八層,樓齡二十,每天早上都有很多居民搭lift返工返學,而今朝早我也是其中一份子,如常搭lift返工。

我正正家住二十八樓,當時一小時零半個鐘前行入部lift時得我一個,當lift門關上後,我就一個人一直一直被困到現在。

聰明的你和不聰明的誰都一定會想到奇怪點……

在繁忙時間中,總應該有人察覺部lift卡在廿八樓郁都唔郁,然後理應問問樓下保安究竟部lift係咪壞L左?更何況在繁忙時間中,本大廈得兩部lift無左其中一部,在正常社會生態下,啲返工人士經歷逐層停後,終於落到樓下係咪應該會嘈死個保安呢?至少……禮貌地問候一下……?

奇怪,很奇怪。

我唔敢諗唯一的解釋……

做人唔好向壞方面諗,或者……

我試圖安慰自己,都只是一小時零半個鐘而已,或者出面已經有維修員正在用特別方法維修呢,可能只是需要比較多的維修時間呢……

點會係日光日白下出現的靈異事件呢?

唔知點解,lift頂上面的抽氣扇轉動聲感覺份外詭異……

呃……還有一件事我是知道的,部lift一定唔是因為停電而停了,因為頭頂的白燈還亮,樓層顯示屏還有光顯示「28」這個數目字,如果硬說成是電梯停電,那可能只是局部機件無電到吧?閉路電視沒有電、對講機沒有電、響鈴沒有電、lift門沒有電去開關、lift的升降功能沒有電去升降。?。算吧,我其實唔多熟lift的機械運作。

只知道我此刻仍然被困在lift到……

說著說著,被困的時間已經達到兩小時。

……

我真的不想去諗起在網上流傳的困lift異聞錄……

題目一,「重口味腹瀉男被困電梯41小時全紀錄,最後他發糞塗牆了」
無以形容的絕望,我看過,我真的看過他的錄像,也不想形容……

題目二,「女子受困電梯30天活活餓死 機廂上驚見抓痕。」
聽說發現她的屍體時,她的手指嚴重變形。
不需要錄像,單單文字對屍體的描述已經夠震懾。

活活餓死是一件很恐怖的事,活活餓死在一個幽閉的空間是一件極級恐怖得想死的事。

「恐怖」也不足以形容這種程度吧?所以,我都不形容自己此刻的內心感受,因為實在找不到適當的形容詞……

lift頂上的抽氣扇似乎依然轉動,但我卻感到難以忍受的局促感,我搭左咁多年lift都不曾覺得lift內的空間原來如此狹小,狹小得令我彷彿不能舒展筋骨,令我有衝動想對四壁拳打腳踢……

我微弱的理性告訴我,升降機上角閉路電視鏡頭還存在,雖然它可能是壞了,但始終不能肯定,難以不感到自己在眼睛底下,所以在事情未變得最糟糕之時,我一定要保持優雅!至少不能夠發糞塗牆!

為此,我要比任何人都心志堅強,我一定要努力令自己唔好痴線!

第一, 我一定要相信呢個不是靈異事件,只是一個意外,呢道門終會有人打開。
第二, 在這種除了等待只有等待的無能為力下,我要想一點方法令自己保持積極。

於是,我打開手機,Click入記事簿,開始寫點東西,學人搞文字創作,讓自己的腦袋能夠專注在一件事,而不專注在此刻令人發狂的困局。

當我把正在面對的現實作為故事打到這裡時,

忽然,在該沒有訊號的電梯內,手機內有個Whatsapps傳來。

【二】

女同事:陳小明,你去左邊呀?女魔頭而家好嬲呀,打電話俾你又打唔通,佢話要即刻炒左你添呀!(藍色雙剔)

我興奮得實在顫抖!落淚得實在感動!無錯啦,有時候lift裡面都可能收到微弱的訊號家嘛,點解我想唔到?點解唔去試試發訊息?

無錯無錯啦!你敢去試,你未必成功,你不去試,你注定失敗!真是他媽的偉大格言啊!

現在!我要趕在訊號未消失前把目前狀況發送給這個女同事,叫她找人來救我至得!真開心!人生成功的秘訣是,當機會來到時,立刻抓住它。

我:Mary呀!我而家被困住喺我屋企大廈部lift到呀!妳快啲搵人黎救我啦!(藍色雙剔)

女同事:你想我幫你講大話都貼地啲啦。(藍色雙剔)

我:頂!我講真架!(灰色單剔)

我:喂!你收唔收到呀?(灰色單剔)

我:喂……救我呀!我無講大話,唔信妳黎我屋企望下啦!(灰色單剔)

我:……(灰色單剔)

灰色單剔……我的心情隨著一秒一秒的等待慢慢墮進谷底。訊號是斷了。

原來,最絕望的絕望,是經歷了希望的絕望。

……

不!未絕望!
既然這裡不是完全沒有訊號,只不過是斷斷續續的話!

這就是希望!

還未絕望的!我要將現在所經歷的一切,傳送到所有朋友和所有社交網站和討論區上!只要一陣間有一秒的訊號,我的狀況就可以突破呢部lift的密封發送出去,為我尋找救援,總會有人發現,總會有人相信,我困住喺部lift入面出唔返黎呢個事實!

……

於是,我開始史上無盡的等待……等待……等等等等等等……

等等等等……杜尬;汪蚪油衽支囚室;伋;坪仍枇去吐台化吋吉化埂泅甸坪伋忸伯沁里古仕丈杯一小時;刀古曼;啤坏衽加;衽瘁;蚪各伕世靡化囤凡呎耿悍凸蚪肖兩小時力鴆王;尬哂寒’啤’ 三小時6化啤沙化穿鄰;千四小時尖束千沙卅伋花疹’盅吳斤;屏瘁尹八也料去炊末乎料凡卅凡卅凡位卉凡杯穿戎吋千

Oh!Sorry,我經歷了一度竭斯底里,打了一堆瘋狂。

保持冷靜保持冷靜保持冷靜……

看看手機的時間,我足足被困了七個小時啊媽!

四壁都留下我一度瘋狂下的粗暴腳印了,但,我對它再粗暴,都不及它以四面牢固包圍我壓逼我使我窒息的殘忍無情。

人在絕處的時候,總會想起世間可能有個神,即使你多麼無神論,你信唔信?總會有一剎那,你總會有一剎那去嘗試求問呢個你根本唔知存唔存在的神。

當你心裡有了神,你終於可以在無助的環境下有一個哀求和發洩的對象。

求求袮救救我,我知道袮愛世人,袮一定係好愛我,我知道袮要我受苦受難係想試煉我,但係咪試夠了?求袮幫助脫離困境,求袮……求袮求袮…嗚嗚…救我…求袮…求袮啦,求袮呀!我話求袮呀!袮聽唔聽到呀!頂!我叫袮幫我呀!袮唔係萬能俠黎咩?!粗口袮個拍手丫!頂袮!食C啦!妖~~唔好啦……唔好唔好唔好……對唔住……係我錯,原諒我……救我出去,我以後會做個好人……頂!袮究竟聽唔聽Q到?

我一陣子跪地哭泣,一陣子又指天幹罵!我完全意識到自己精神失常……係……我終究還是痴線了,而且我知道我還會更痴線……

如果不是手機內的時間顯示,我真的不知道自己在這裡待了多久。

再過多幾分鐘,我就足足被困了十二小時了……對你黎講緊係「咁快嘅?」,對我黎講,老土嗰句,每分鐘都係折磨。

期間,我撒了兩次尿,令困住我的這個箱子充滿了阿摩尼亞的氣味。

但沒所謂,因為人體有嗅覺痲痺的功能,尿味已經唔係尿味,它是清水,解渴的清水,無錯,飲得嘅。

我所看見的世界是灰色的,因為lift身是灰色的。
眼下的灰色世界已經再無生機……

直至手機響起來電鈴聲……

【三】

我立馬接聽,心跳得砰砰砰砰砰砰,不能形容的亢奮,不能錯過的機會!

「喂?我想問你係咪陳小明先生?」一把陌生男人的聲音。

「係係係!你係邊個?我唔理你係邊個,你要救我,你一定要救我!我而家困左喺屋企大廈部lift到出唔返去呀!求下你救我呀!」

「陳先生,唔緊要架,困lift好小事,你聽我講而家你面對緊一件事仲更大件事呀!」

我心諗,有咩事大得過我被困在lift裡面十二個鐘未出得返去?

「是咁的,我係入境事務處打黎,你在內地有個戶口涉及商業詐騙,嚴重的可能你會被判坐監,所以我地打黎要求你出示你戶口號碼同密碼,等我地幫你查證一下。」男人一本正經地說。

「入……入境處……請你唔好收線,聽我講……我而家困lift,一陣家又可能會無左訊號,我求你,如果你幫我報警,我出到去乜Q密碼都俾哂你!」我唔理他是個騙徒啦,最緊要佢幫到我出去!

「唉……先生,其實困lift真係好小事,邊個人未困過lift?你不如試下放眼看世界,唔好俾你眼前的困境蒙敝,你有無聽過生命學家懷特曼曾經講過,在寒冷中顫抖過的人倍覺太陽的溫暖,經歷過各種人生煩惱的人,才懂得生命的珍貴?」

「唔……唔係呀!你聽我講,我唔係呃你……」心諗,呢個騙徒係咪玩野?

「我都唔係呃你!我真係入境事務處職員,你真係有個戶口有問題架!」男人肯定之中帶點激動。我抓狂!呢個唔單止係個騙子,仲係個痴線!真係十分罕見!

「咁……咁你而家過黎拉我!快快快!我就喺幸褔花園第一期部lift到……」我仍抱懷希望。

「唉……其實比你慘的人真係有好多,你只不過困左喺部lift到之嘛,你知唔知,有啲人甚至俾人誤會死左然後困左喺棺材入面出唔返去,佢地咪仲慘?佢地喺咁狹窄空間裡面一路等死,而你呢?你至少可以喺部lift到打關斗啊!」

真讓人感動不已,不少人在生命的困境中,身邊往往出現很多十分明白你處境的痴線友來激勵你勇往直前!但激勵人至少有個底線?

「唔係lei,你……我……我真係俾哂所有錢你架,我只求你幫我做一件事!」我有一種對痴線佬永不放棄的堅持。

「唔係lei,你……(無聲無聲)……加油……(無聲無聲)……」

「喂?喂?喂?唔係下話?喂……」

線斷了,希望斷了,輕輕的斷了,我心裡輕輕奏起了一首悲曲。

我流淚,痛哭,蹲下,抱頭,痛哭。

這個男人可能是我人生中最後對話的人……我永遠記得他所說的最後一句「加油」。

這個時候,我要爆了。

急屎呀我。

【四】

我拉了一篤屎。

不,我拉了一位朋友。

嘻嘻……等我幫你用手指加返隻眼同個口先!Wow!好靚仔呀你!Hi!Peter!

NoNoNo!你唔好咁諗,喺我心目中你唔係一篤屎,你係我喺呢度嘅唯一朋友!我唔準你咁講!就算你真係一篤屎,你都係呢部lift之中最靚仔嘅一舊屎,屎之中無屎比你更加靚!

唉,不過Peter呀?唔知我地幾時可以出返去呢?你知唔知呀?我地已經困喺度廿四個鐘喇!

我懷疑呢,根本唔會有人黎救我地囉。

你知唔知我喺最後一次有訊號時,收到一大堆Whatsapp同facebook的回覆啊!你知唔知佢地話咩呀?

我個Friend阿力呀,佢叫我收皮呀,話我吹埋啲咁嘅水,睇完之後污染佢雙眼喎。

阿思呢,佢好好呀,佢叫我唔駛驚,話精神病都係病黎嘅,有得醫架……

仲有嗰個女同事呀,一開始Whatsapp我嗰個Mary呢,佢覆左我喇!佢話我老細抄左我喇!佢恭喜我自由喎!

講到呢度,我都眼濕濕添,

我媽媽,她都收到我的求救短訊……

仔呀,媽媽知道你而家好驚。

你記唔記得你細個嗰陣成日跌低,跌痛了,我就會對住你唱「少少苦楚等於激勵,等於苦海翻細浪」,然後你就會跟住我一齊去唱。

你大個仔喇,唔會再論論盡盡喇,不過你記唔記你嗰年會考,你好努力好俾心機去溫書,但你居然喺你最有信心嘅一科失手。在最失望的那天,夜晚你粒聲唔出靜靜坐喺我身邊睇電視。

到你出黎做野,我知道你返工經常受氣,對自己又無信心。在最難過的那天,夜晚你依然係粒聲唔出靜靜坐喺我身邊睇電視。

然後我睇住你認真拍拖,認真失戀。在最傷心的一天,夜晚你又粒聲唔出靜靜坐喺我身邊睇電視。

你開心嘅時候,你唔會坐喺我身邊,你總會去玩去打機去工作,但你每次唔開心時,你都會想起我細個跟你一起唱「少少苦楚等於激勵,等於苦海翻細浪~~」

媽媽不在了,很想幫你,很想和你唱歌,很想跟你打氣……(藍色雙剔)

「少少苦楚等於激勵,等於苦海翻細浪~~」我哼起歌,在只有我和Peter的lift內。

我媽媽,早在兩日前交通意外過身。

至於點解她此刻會收到我的短訊,點解能夠回覆我?

是誰覺得在這詭異奇幻的故事裡,每一件事都會找到點解後的答案?

我媽媽已經死了,但她收到我此刻的短訊,然後仲覆了我。這不已經是答案嗎?

在無人的升降機廂裡,是誰綣縮在一角,等待無盡的絕望?

終於……【The End】

「先生,你聽唔聽我講野?你知唔知道自己叫咩名?」

「陳……小明。」

【The Real of End】