Pokemon Go成為全港熱潮，當然要趁墟寫返兩句。
痴左線啦，如果你仲只係返工放工返學放學搭車途中玩嘅話，不如你落一轉樓下附近啲公園先啦！
男女老少、拖住個仔又好，推BB車又好，總之阿豬阿狗都玩緊同一個遊戲，人流聚集嘅地方，一定係有三幾個Pokestop開左Lure…
身邊都有唔少人玩，有屋企嘅長輩啦，公司同事啦，朋友等等，相信大家都係咁。
「小火龍，就揀你啦！」「Pika Pika！」「我要捉傻鴨！」「嘩隻伊貝好得意呀！」呢啲說話，相信身邊都聽左唔少次。
拿，有班港女貪得意(真係貪啲精靈得意，唔係貪呢件事得意)其實都預左，又無咩特別反感。
至於長輩趁熱潮，想了解下年青人，甚至希望藉此拉近下同呢一代嘅距離，就算佢地除左比卡超之外咩都唔識，都仍然繼續玩，更加唔會反感，仲好欣賞添！
今次想講嘅係，見倒有一班人，貌似投入而根本認識唔深，真係望唔透…
「頂！又係蝙蝠，真係多到唔想捉…」「咦，有隻比比鳥喎(實情係鬼雀)」「條蟲好廢，唔想捉囉(無蟲判斷究竟講緊綠毛蟲定獨角蟲)」
心諗，你連波波比比鳥定鬼雀都分唔倒，連波音蝠都嗌唔出，你玩黎做乜撚？好心你唔好自稱精靈訓練員ok？係對寵物小精靈有認識嘅人，根本就唔會忘記佢地叫咩名！
呢隻game，對一個真正嘅精靈訓練員黎講，真係實現緊佢地細個嘅夢想…
