眨吓眼原來佢已經黎左我屋企2個星期,已經開始習慣有一個靚仔住喺我屋企。雖然係相處上邊冇咩大問題但係我發現佢對我嘅感覺好似有啲曖昧......我心裏面諗因為我係佢喺現實入邊第一個見到嘅人。所以我就好似佢阿媽咁!?如果我聽多次ASMR會唔會出多個靚仔出嚟?都係唔好咁多嘢搵自己搞咩。

子豪:「點解你成日都喺度諗咁多嘢?」我擺出勁錯愕嘅樣「點解你又知嘅?」
「同你相處左兩個星期我點會唔知呀?同埋......」
「同埋?同埋啲咩啊?」
子豪:「冇啊我唔講。」
頂!最憎呢啲講啲唔講啲嘅屎忽鬼。依家懶神秘唔想知啊~

我哋有時一齊出門口食飯買日常用品嘅時候啲鄰居都會問下我哋係咩關係,而我通常就會Hea佢哋講佢係我呀哥,但啲鄰居點都唔都唔信:「男朋友咪男朋友囉,依家啲後生仔女同居做咩收收埋埋喎。」呢個時候我通常都會好尷尬咁樣笑下就算。
但係其實我都要諗吓長遠來講我應該點樣帶佢面對我啲朋友甚至屋企人呢......

就係咁岩得咁橋中學時候嘅好朋友啊澄打俾我問可唔可以今晚沖上嚟我屋企聚下,仲要係成班舊同學聚會,咁我梗係拒絕啦入邊仲要有我曾經暗戀過嘅男仔......
如果佢哋成班人上嚟一定會超尷尬仲有我有個極大嘅秘密就係子豪!