我個名叫林依橋,有好多人都叫我做「姨姨」已經啱啱好20歲。由中學畢業已經出嚟社會工作,係一名兼職模特兒。雖然我個樣生得幾標緻,但係身邊嘅男仔都會因為我性格成個男人婆咁而Bro-zone我......就係咁樣我呢一世人都未拍過拖。身邊嘅朋友成日都拉我去聯誼但係我始終係見一個嚇一個。究竟我幾時先會有男朋友呀......

有一日發生咗超級奇怪嘅事......

平平無奇嘅一日,係工作室拍咗八個鐘頭,所有嘅笑容同埋筋骨都已經變咗僵硬。當拍完最後一take嘅時候,即刻9秒9換衫沖落樓下搭巴士返屋企。我係自己一個人租屋住所以成間屋面積都唔係好大有一個小露台,但係勝在有格調而且裝修都幾唔錯。一返到屋企即刻換咗件鬆身衫攤咗喺張床度,用部MacBook碌下YouTube 睇吓有咩得意野睇。突然間睇到一條片個標題:「單身人士女性向ASMR|回家後男友......」封面係一個男仔抱住一個女仔嘅漫畫話場面,之後我帶着好奇心撳咗入條片裏面。

「你今日係咪好攰啊?」一把磁性嘅低音男人聲音,嗰一刻我以為自己真係有一個男朋友係屋企入面等緊我。短短係呢幾句,「快啲沖涼我煮咗飯等你」已經完完全全令我單身左20年陷入喺呢條片入邊。但係我嘅理性將我拉番出嚟,不停同自己講唔好對呢啲虛構嘅事咁上心,喺條片仲未到個男朋友同個女朋友進行白熱化嘅階段,已經將成個YouTube撳咗交叉。突然間有人喺我耳邊講咗一句:「做咩唔聽落去啊?」雖然把聲係超有磁性超好聽,但係當刻我以為自己發生靈異事件,嚇到個人碌咗落床。有一個超級靚仔,頭髮烏黑亮麗而且雙眼有神仲有個鼻超級高但係塊面就超級細。成個樣係翻版車銀優!!但係我當時完全俾佢嚇親,我以為目前啲個男仔只係我見到嘅「鬼」。