總有一個人係你無信心嘅時候比信心你,全部人唔信你嘅時候信任你。

我中學個陣有一個女朋友,佢叫阿澄。

佢係我第一個女朋友,亦係我分手後最釋懷唔到嘅個個。

好記得得中學嘅我讀書差,唔算係高大靚仔,又無一技之長,又唔係有錢。

但係條件好好嘅佢竟然唔選擇其他比我優秀嘅男仔,選擇最平凡嘅我。

我好愛佢,依家都係。

仲記得有一次,我同佢情人節去左一間比較貴嘅餐廳食飯。

雖然我仲係學生無咩錢,但係我覺得我身為男仔,應該要係呢個日子請佢食飯。

一見到張單,仆街九百幾蚊,我忍痛抽出兩張五百大元。

佢捉住我隻手,笑左一笑,望住我講:

「你唔洗扮大方啦,我地仲係學生,分開比咪得,等你搵到錢先再請我啦傻佬。」

我個刻真係好感動,雙眼好似有一股熱流想湧出來。

佢好溫柔咁摸住我個頭,拎出一張五百蚊,同我講:「今餐AA得啦。」

我好感動,出到餐廳門口,我忍唔住抱實佢喊。

個一刻,我知道,呢個咁好嘅女仔,我將來一定要比到幸福佢。

每一次其他人睇死我,話我廢柴,得佢一個留守係我身邊,支持我,開解我。

陪我係中學個陣捱窮,明明大把男仔好條件過我,但係佢都依然對我忠一。

每次我問點解佢要揀我,我有咩好。

佢都會摵我塊臉,同我講:

「我鐘意你唔係因為你比其他人有咩優勝,我鐘意你係一種感覺,係其他人比唔到我阿傻仔!」

我知道佢好好,但係到最後,我都係敵唔過自己嘅自卑。

係中六升上大學個年我派左去中大,佢係poly。

個年我同佢分左手,因為我知道上到大學佢見識多左,我嘅地位會比人取代。

我寧願早早分開,都唔想等待個一刻發生,我知個結局會差,但係我唔想太差。所以我選擇盡早謝幕。

分手個日佢喊住同我講:

「點解你成日都咁自卑,唔信自己,唔信我?」

我唔係唔信你,我係知道自己好差,我知道大學生活燈紅酒綠,好多引誘,你始終都會覺得我比起佢地只係過於普通,只係平凡人。

中大同poly嘅距離唔止係新界同九龍,而係我同你上到大學之後,大家心嘅距離,見識,等等都被拉開幾千光年。

我依然都係咁愛你,可惜嘅係,我依家有能力可以比到幸褔你嘅時候,你已經唔係我身邊。

我有時會諗,如果我當初相信自己,相信你,個結局會唔會唔同呢?

今晚,又係一個失眠嘅夜晚。

我聽住手機播放陳奕迅嘅天下無雙,又諗起你。

好掛住你。