如果你係有睇開日本嘅動漫，一定唔會對七原罪感到陌生。七原罪係根據聖經經文整合而成嘅（喂喂喂其實我係無神論者，純粹係覺得聖經對『罪』嘅觀點有點兒有趣），而現今嘅七宗罪就係指：傲慢 (Pride)、嫉妒(Envy)、憤怒(Wrath)、懶惰(Sloth)、貪婪(Greed)、暴食(Gluttony)、色慾(Lust)。而呢個咁嘅七原罪就俾唔少日本動漫攞嚟做題材去發展佢嘅故事，例如『七大罪』、『鋼鍊』，仲有好多其他好多（我無睇過嘅:0) ）都會用到七原罪去做故事嘅中軸；不過今次我想探討嘅唔係呢七樣嘢，而係由幾年前開始一直喺我腦裡面嘅一種想法，都就係第八宗罪：期望(Expectations)。
WTF？睇到呢度都可以負皮上一頁:0)。明明期望就唔會係啲咩壞事，你『罪』佢做乜嘢呢？但係，從來善與惡永遠只差一線，『自信』和『傲慢』；『羨慕』和『嫉妒』；『需求』和『貪婪』，過度嘅自信、羨慕、需求就往往好容易變質，成為七原罪嘅傲慢、嫉妒、貪婪。中國人向來有句說話：「希望越大，失望越大。」就正正因為過多嘅期望，當件事並非你想像中嘅情節發生，係會有一份失落感。嗰種失落感帶來嘅絕望、恐懼、焦慮令到一個人失控都係無可奈何嘅事，而呢個『期望』我之所以覺得可怕嘅地方係，你無辦法去避免。本身嘅七宗罪的確係有方法去控制，但係『期望』呢？「人無夢想同條咸魚有咩分別呀？」呢一句經典得嚟亦都無從反駁。做人係一定要有夢想嘅(關於呢方面嘅原因呢度就唔討論喇)，而當你有夢想就不期然會有『希望』、『期望』、『盼望』、『奢望』。中國人真係好鍾意整一堆差唔多意思嘅詞語嚟顯得自己民族有幾咁博學多才，但係唔理得你望邊樣啦，呢度我都只會統稱做『期望』。而人嘅『期望』我會分為三種：對自身嘅期望、對他人／事嘅期望、來自他人嘅期望。跟住落嚟亦都會由呢三個方向出發去做討論。
首先，對自身嘅期望。唔難理解，亦都係最容易會有嘅期望。繼續講返人嘅夢想先，一般大家有嘅夢想都係啲咩要賺到錢呀、買樓呀、結婚呀、生仔呀（或者一世單身都好啦）；又或者想擁有啲實質嘅嘢：車、錶、電子音響設備；又或者可能會同你嘅職業有關，「我要做醫生！律師！」嗰啲有巨大抱負嘅小朋友啦。呢啲全部都係夢想，當你有夢想，腦裡面就一定有達成夢想嘅畫面，呢個畫面就已經成為咗你嘅『期望』。吓？咁易架咋？係，就係咁易。本來，有呢一份嘅期望可以成為你嘅一份動力，係好事嚟嘅；但係有更多嘅時候，天係會同你過唔去，會俾重重嘅阻礙你，你可能可以越過晒佢哋，繼續追你嘅夢；你亦都可能會俾呢啲阻礙擊倒，放棄咗你嘅夢想。你明明努力過，但係都會有阻礙甚至失敗，你可能好洩氣，可能好不忿；好多時唔係你嘅錯，件事都會向著唔好嘅方向發展，點解？好簡單，你嘅人生唔係玩緊單機版，『人生』呢個遊戲唔係只有你一個玩家，係有76億個玩家，仲有更多嘅玩家等緊註冊帳號去誕生喺呢個世界玩呢隻『糞game』，每一個玩家都會影響緊呢個遊戲嘅發展；亦即係話一件事就算你努力過，到最後始終會有啲人和事你無辦法去控制，導致你嘅失敗。咁咪無法避免？心態取決一切，你可以放棄，可以堅持；呢方面我冇辦法去得出邊一個選擇先係最好。拿破崙面對著聯軍，在滑鐵盧戰役嘅慘敗中宣布投降，放棄自己嘅野心，儘可能減低對國家嘅損失（可能係）；屈原面對著頑固嘅楚王，多番勸阻並希望可以阻止秦國嘅陰謀，咁當然楚王就冇聽啦，啊屈生就放棄進諫去咗投河（雖然件事係冇改變到秦國統一嘅事實，但係我哋都叫多咗日假期嘅）。咁當然堅持嘅人都唔少：勾踐臥薪嘗膽；貝多芬聾咗繼續作曲；諾貝爾曾經研究炸藥失敗，甚至失去埋個細佬都堅持落去；歷史上當然仲有好多堅持嘅人取得成功，但係當我哋冇辦法知道未來嘅時候，或者早一啲放棄天馬行空嘅夢想去腳踏實地做人都未嘗不可。
會唔會講遠咗呀，講講吓『期望』變咗講堅持同放棄。頭先一開始都講過當一個人失敗嘅時候，『期望』所帶來嘅絕望要去擊倒一個心靈軟弱嘅人並唔係一件難事，咁就好易導致佢哋冇辦法去好好分析佢哋嘅失敗，覺得成件事已經冇可能成功，去放棄本來可以爭取嘅夢想。咁幾時應該去放棄？呢個冇一個既定嘅答案，每個人都有佢哋認為佢哋值得去做嘅事。堅持同放棄都係人生一個好重要嘅課題，兩邊嘅選擇都會有各自嘅道理，最重要唔係做咗會令自己後悔嘅事即可。
跟著落嚟嘅兩種『期望』就係一pair嘅，就先講一講對他人／事嘅『期望』。相信唔係A0嘅朋友（如果你係，sorry），拍拖嘅時候都一定對你嘅伴侶有一定嘅『期望』。你會『期望』你嘅伴侶能做到你最理想嘅對象，又或者對佢給予足夠嘅信任，『期望』佢唔會做背叛你嘅事。先唔講後者，但前者如果缺乏溝通、抑或語氣嘅問題令對方誤會，帶來嘅傷害你本人係可能唔會想像得到。作為男生嘅你，有否曾經『期望』過你女朋友可以理智啲，唔亂發脾氣？作為女生嘅妳，又有否曾經『期望』個你男朋友可以打少啲機，陪你多啲？照顧返A0嘅朋友，唔明以上所講嘅都唔緊要，諗一諗你嘅父母；你嘅媽子又有冇對你唔同方面對你有所『期望』，日哦夜哦你？「讀書啦仲打機，正衰仔。」又或者「好心你執吓房啦，係要做死老母。」
再講一啲更實際嘅例子，就喺尋日（即係6月11號），梁天琦嘅六年判刑，相信大家都好氣憤，而大家氣憤嘅原因亦都係因為呢件事嘅事實同大家嘅『期望』有所出入啦，「使唔使6年呀？！」2016年農曆初二嘅所謂『暴動』又因咩事發生？大時大節小販出嚟旺角賣吓魚蛋（在此我並唔評論呢件事嘅對與錯），受到食環署嘅種種管制，甚至趕絕佢哋；再到後來開始衝突，開槍事件，騷亂、『暴動』。呢一切一切嘅事起源都係食環署、警方同大眾巿民所擁有嘅『期望』有所不同。冇錯，當『期望』同『現實』唔相符，人的確好易衝動；或甚者，會造成恐嚇，威逼等等嘅事：唔理係綠帽裸照嘅事件，定寄刀片信嘅事，每日都聽唔少架啦。過多嘅『期望』，而你又無辦法去改變事實，但係又唔想去接受呢個現實，咁可以做啲咩？上述講嘅人訴諸暴力；有人行屍走肉，日子得過且過。而你，遇到呢類型嘅事，同你『期望』中嘅事有所出入，你又會選擇點做？
最後就係來自人哋對自己嘅『期望』啦。我哋又返番去媽子嘅嗰個例子先，大家都做過人哋仔女，屋企人唔多唔少都會對你有『期望』。好受嗎？如果你覺得你嘅父母唔算係『怪獸家長』，恭喜你先；如果係呢？就喺大約2017年既2月，網上流傳咗一條好令人反思嘅微電影－『我的生涯規劃』（未睇嘅快啲去睇返）。冇錯，個小朋友主角係好恐怖，但係點解佢要咁？其實呢個係一個好好嘅例子去帶出受到人過多嘅『期望』所發生嘅後果。嗰班小朋友一直受到屋企人因『期望』而去不斷施加嘅壓力，失去童真，想法偏激。而呢一種嘅壓力可能唔止係心理上嘅，亦可能會係肉體上，即係所謂嘅體罰。相信大家為咗去避免呢啲壓力都試過對佢哋講過大話，為嘅只係希望俾人哦少句、鬧少句、打少下。更可悲嘅係呢一種『期望』你係完全冇辦法去控制，唯一可以做嘅係同對方溝通。溝通唔到咁點算呀？相信唔使睇返統計表都知呢幾年究竟有幾多學生去輕生，而呢個社會既無動於衷實在令我哋感到無奈（始終生活得喺呢個社會，就又難免對呢個社會抱住『期望』嘅）。
人類作為群體生物，一齊生活就一定對對方會有『期望』。呢一方面我哋唔似其餘七原罪可以避免，我哋可以做嘅係將自己嘅心態改變。雖然人係群居，但係人喺群居當中又係一個獨立個體。每個人出生都係自己一個誕生落嚟（唔好同我講雙胞胎三胞胎），去到離開呢個世界嘅時候亦會係自己一個（唔好同我講咩大災難一齊死），每個人嘅一生其實都要為自己而活。做好自己，外來影響嘅因素就隨遇而安；而對方亦有自己嘅人生，同樣係為佢自己而活，過多嘅『期望』辛苦自己又俾對方壓力。要去改變呢個心態唔係易嘅事，畢竟有一種人就係無辦法享受自己一個嘅生活；人要去先學識愛自己，先會識得點去同人相處，將『期望』用喺善嘅一面。
寫於2018年6月12日
狐說八道
wfc
