〈關於抗壓能力這回事〉

每當睇見有關學生自殺嘅新聞報導,我都發現有唔少人批評而家嘅年輕人抗壓能力低,唔捱得。我好疑惑,年輕人抗壓能力真係低?但所以高低又冇明確準則,倒不如諗學生面對嘅現況。

我心情極度低落,開始唔信任社會,對一切事物都抱有懷疑,甚至連自我嘅信念都一一推翻。我痛恨卑劣而無能嘅自己,恨不得將自己好似文字咁刪除。

如果你問我,我有冇諗過自殺。我有,但只係純粹衝動嘅諗法,下咗啖氣就咩事都冇。當然自殺係成因複雜嘅事,冇可能一概而論,但我覺得畀年輕人喘息嘅空間係十分重要嘅。

我做學生嗰時,身邊嘅人不停對我講,要好好努力讀書,然後考入大學。但我成績只係喺邊緣位置,讀書經常唔入腦,因此其他人嘅期望就造成我內心嘅窘迫。

我都想考到好成績,但我真係做唔到。我讀書又唔叻,興趣又唔大,所以經常滿足唔到父母嘅期望。

然後當我用電腦嗰時,父母第一句就話:「成日淨係識得打機,你讀書有咁勤力就好啦。」同朋友出街打波,佢哋又話:「成日淨係識得玩,又唔讀書。」有時返完學好攰,想抖一抖先做功課,佢哋又話:「返到嚟就淨係識得瞓,功課又唔做。」

唉!喺父母心目中,好似除咗讀書之外就咩都唔啱,咩都係錯。有時想放鬆一下,又俾人話好食懶飛。佢哋連一句問下我辛唔辛苦嘅說話都冇,又冇體諒過我,就一味添加壓力。

學業壓力、人際關係壓力、其他人嘅期望、自我嘅迷惘……小朋友出世冇耐就要上學前班,連幼稚園面試都要補習,為求學爭到你死我活。

唔少DSE考生上完堂仲要補課,返到屋企又要溫書,星期六日又要補習,假期又要返學,加上家長、學校嘅催迫,根本連喘息嘅空間都冇。

點解唔可以畀多啲時間年輕人思考自我?或者發展讀書以外嘅興趣?點解讀書成為咗學生唯一嘅出路?

個個學生都讀書,唔通個個都想讀書咩。不停嘅催迫只會加重學生嘅負擔。而更重要,更重要嘅係,佢哋根本冇時間去探索自我、了解自我,就被強行放喺預設嘅跑道上。佢哋冇時間思考人生,搵唔到生存嘅意義,又一味被催迫。到底有冇人體諒過班學生?

小朋友一出世就要不停競爭,不停學習。到底父母有冇認真了解過自己嘅仔囡?定只係將自己嘅理想套諸喺佢哋身上,成為自己嘅理想傀儡?

退後一步諗,教育制度係咪只係為培養學生工作同服從能力而設?學校係咪只係職業培訓所?再退一步,到底教育嘅意義何在?

太多問題我都得唔到答案,但我始終認為學生嘅心理發展,同規範化嘅學術教育同樣重要。人嘅抗壓能力同環境有密切關係,單純將問題歸因於學生嘅個人質素上,實在唔明智。