〈關於工作這回事〉

如果唔嫌我囉嗦嘅話,就聽我發酒瘋啦。

人點都要做嘢啦!呢句係我從身邊嘅人口中聽過最多嘅說話。佢哋話我吊兒郎當、不成氣候,又話年輕人冇包袱,就應該趁後生四圍跌跌撞撞、開闊眼界、嘗試同學習唔同嘅新事物。

呢啲說話聽起嚟好合理,我亦都認同。但佢哋通常都會補上一句,人點都要做嘢賺錢,唔係既話邊度有錢食飯,邊度有錢結婚買樓。

哈哈!唉!呢班人到底喺度諗咩?工作就係為咗賺錢,賺錢就係為咗生活,而大部生活嘅時間都係度工作。咁佢哋之前講嘅得體嘅說話,最終目的都係為咗做嘢賺錢過生活。

我喺度諗,工作嘅意義係咩?大概就係賺錢啦。正常人聽到呢回事都會覺得理所當然。雖然我唔似Alfred Adler一樣對人生嘅任務有深入探討,但我硬係覺得呢回事好有問題。人努力工作賺錢嘅目的,就係為咗繼續生存。如果每日營營役役噉生活,喺痛苦中渡過,點解仲要努力工作賺錢過生活呢?

如果。我話如果。如果每日重複而繁重嘅生活係痛苦嘅,點解唔早啲結束生命呢?點解要繼續做痛苦嘅工作延續痛苦嘅生活呢?唔通我今日辛苦噉工作,係為咗聽日都可以辛苦噉工作?我諗唔通,但我可以肯定嘅係,喺努力工作賺錢過生活之前,我嘅人生必先有值得活落去嘅意義。

所以呀,喺我睇嚟,搵到值得活落去嘅意義係先於工作嘅。或者係人將工作同生活呢回事睇得太理所當然,所以就不問因由噉工作、生活,就好似呼吸一樣自然。但冇人諗過點解要呼吸,亦冇注意過自己嘅呼吸。

不過做嘢都係好嘅,最少喺工作中可以體現到自己嘅能力同價值,等自己感覺到自己係個有用嘅人。喺自己成長同進步嘅時候,喺工作上就能反映自我能力。就好似玩遊戲嗰時,睇到自己level up就知道自己變得更勁啦。呢個工作嘅原因點都比為咗錢更加得體啦!

我喺呢段時間不斷喺度掙扎。冇做嘢嘅我實在體現唔到自己嘅價值同能力。唔知道自己嘅能力勝任咩工作,唔知道自己嘅能力水平高低,甚至開始對自己失去希望。呢件係幾咁可悲嘅事。

但係而家嘅我好堅定。我鍾意寫嘢,大概個性都適合寫嘢,就趁年青嗰陣全心全意噉去做。年輕人咪就係要四圍跌跌撞撞、開闊眼界、嘗試同學習唔同嘅新嘢咩?

我聽見身邊嘅人係咁講嘅,但似乎喺我身上並唔適用,尤其是係長輩。佢哋睇見我冇讀書同做嘢,就覺得我成天無所事事,係懶惰同頹廢嘅人。

點解唔讀書同做嘢就一定係無所事事?唔係只有工作或者讀書嘅人先可以學習同進步呀?讀大學嘅學生都唔見得個個都係好學嘅人,做嘢馬馬虎虎嘅人都比比皆係。但係而家寸步未展嘅我,又可以喺佢哋面前講咩呢?又憑咩可以同父母討價還價呢?

唉……而家嘅狀況並唔樂觀,就連自己都開始懷疑自己。未來嘅路要咩行,我都仲未有頭緒,但我實在都唔可以咁樣長久落去。呼!都係再飲多幾罐啤酒比較實際。
==========
想睇返之前嘅文,可以睇:https://www.shikoto.com/i/M4Z
fb:https://www.facebook.com/168781870423363/