回答呢個問題其實唔難。

講起自己有真正名義上屬於自己嘅手提電話果時係中四,人仲係好年輕,仲未有智能手機呢個名,大家嘅手提電話仲係只係用嚟溝通,不外乎傾電話同發下短訊,仲係要同台先可以免費發嘅時代,果時朋友間要打機仲要充分利用三人會議呢個神級發明,邊有得好似而家咁方便,手提電話真係一部電話嚟,大家對住佢唔會低頭,只會係咁噴口水落去,仲要佢夠細夠輕,最多就買張記憶卡入啲歌落去聽吓,邊可以睇人地幾時最後上線咁毒啊?

IPHONE嘅出現令電話唔再係電話咁簡單,咁簡單嚟講佢已經變成一樣有電話功能嘅新科技,對於無錢嘅我嚟講其實就唔太影響,一嚟新嘢向來在香港都只係三分鐘熱度,但隨住手機網絡發展,呢件新產物都變成主流,好多以前電影先有嘅畫面真正出現係現實世界,篤吓篤吓就交易買賣,隨時隨地接收外界資訊,唔使打電話都可以同人見面溝通,呢啲發展都集中咗呢一件產物身上,科技行得快過火箭,果陣我仲用緊NOKIA。

好嘅嘢係值得比錢去買,所以我明白我追求唔到佢,所以第一部智能手機我唔係買佢,佢品質係唔係好都唔到我考慮,我只係因為時代咁所以要試用新嘢,習慣咗一樣嘢而要突然淘汰係好難受,我都想NOKIA爭氣啲,但最後佢努力到斷氣,不知不覺佢唔再叫手提電話,佢變咗有智慧,人類將會變成可以溝通嘅產物,令佢可以同人溝通,反而人同人之間嘅關係就變得更加冷漠,一段關係可以透過文字去開始同完結,私隱透明到你隔離屋都可以出賣,甚至你一句說話都可以令你入獄抱憾終生。

IPHONE我唔係未用過,但係我用極都係覺得好陌生,因為用親佢都覺得自己好白痴,明明一樣嘢可以簡單做到,偏偏要做多幾步,每個人追佢新款新一代,但問佢會點用都係答打機順啲個螢幕又提升咗幾多咁,事實證明,佢真係打造出好多好似幾主流嘅影響,人人都用佢嘅原因好似得返因為佢叫IPHONE呢個名咁,你唔知點解會買但買咗佢嚟用你會好開心同覺得應該要買,身邊人都會羨慕你,唔用就會問你點解唔買唔用?

嗯,我望一望妳部用咗四年嘅IPHONE,佢已經慢咗好多,但妳都照用等緊錢去買新機,其實妳都知個答案,習慣咗嘅嘢唔會想去改係人之常情,只係妳都會同其他人一樣會問我呢個問題,我唔會覺得奇怪,因為人就係咁,無論邊度嘅人都係咁。