我望一望部PS4，佢已經無開大半年，大多數時間我開著電腦自然就唔會搞佢，最主要係我懶得轉畫面，睇見一隻大作嘅誕生，本應該係三五知己一齊傾計打打遊戲嘅時間，而望望窗外，同一片天空下有啲人同我地嘅諗法可以相差好遠。
因為呢隻大多數人嘅童年回憶，香港人容易善忘嘅特質就會充分表現，人係自私嘅，包括我自己在內，玩樂自然係最吸引人去享受嘅一件事，不管外頭風波有幾大，大廈將傾也好，可以玩多陣係人類必然會選擇嘅事，你睇到時間已經去到凌晨三四點，但素材就係差他媽的一兩件，唔通唔打埋落去咩，未完成到果種心情我諗無乜人抵擋得住。
好可惜嘅係我無一個屠龍嘅童年，童年嘅自己連遊戲機都未買過，到屠龍出現嘅時候身邊嘅朋友都無玩開，妳問我呢個問題真係問著我，我可能都有少少理解，除咗啲型棍嘅裝備武器之外，屠龍最重要嘅係合作，當然有部分人係鍾意從恥笑對方之中得到快感，呢種都係一種樂趣嚟嘅，朋友就係互相傷害對方先會熟稔。
新鮮感同童年回憶雙重合擊之下，又炒起一陣屠龍熱，但呢份三分鐘熱情相信同香港人鍾意炒賣一樣，好快又會有替代品出現，到時再屠龍就會比人笑：「嘩，你仲玩緊？」，持續到尾到爆機唔係人人都會做到，如果係就唔會第二日已經搵到人賣二手，屠龍屠嘅係一個短時間嘅回憶，你可能未必講得出以前屠龍發生過咩趣事，但你就會用果種回憶令自己去買返個回憶返嚟，你渴望去重回當日果種大家為一件事去努力嘅成功感，屠到天光都唔會覺得空虛，仲覺得好值得仲要同身邊嘅朋友分享戰績，努力去做自己想做嘅嘢自然唔會點後悔，後悔嘅往往係未來嘅某個時刻，好似呢個妳問我屠龍好玩在哪嘅時候，我有試過屠龍但無隊友，坐過貓車太多自自然然就會想熄鬼咗佢，屠龍嘅意義係邊？樂趣在其中，當你鍾意嘅就算無意義你都會搵到樂趣，當你見到一件事大家好熱血去做最後原來會有人撥冷水，咁又點會有人想出嚟做第二次。
一個契機會喚醒一班人，一隻遊戲會喚醒一堆回憶，你會為好人好事而高興，但又只會為不義而感到無奈，世界就係咁黑暗呢個道理，遊戲世界之中你無任何束縛可以大膽放手去做。
龍？想屠咪屠，唔會有報復，唔會有後果，最多你只會驚上網唔夠快。
打完雙眼通紅，望望IPHONE個鬧鐘又夠鐘返工，銀包一嘟飲埋罐咖啡你又可以捱多日， 諗吓出糧買咩去邊度旅行，坐坐吓又收工，一日輕輕鬆鬆，又可以去屠龍。
我答妳不外乎都係童年回憶所以啲人先會一窩蜂去搶，妳比個嗯嗯嘅反應我，最後係張IG相篤咗兩下。
