其實返會展做展覽助理幾開心,有啲位係企喺出入口,拎住部機嘟下入場證,唔駛用腦就有糧出。

聽啲做得耐嘅同事講,商展越嚟越少參展商,又少咗人入場。(暫時)唔將灣仔運動場改建會展好應該啦,莫講話對運動界踩多腳,個市場係咪真係有需要先?

所以為咗吸客,主辦商就要出錢做宣傳派甜頭。咖啡、奶茶、菠蘿包、咖哩角、貴價雪糕……同事不斷向入場嘅人派發食物兌換券,啲客拎完券,打個白鴿轉,等於食咗個Tea。(呃,其實我都食唔少。)

搞搞下,我就懷疑,到底成個場係食客多,定真心客多呢?

唔理係點,搞著我先。

因為香港人為咗R著數係會「回復你本來嘅真面目啦,古羅卡」,同埋一味要人滿足自己,而唔聽人講嘢嘅。

曾經有個男人匆匆忙忙,走埋嚟問做緊機械人嘅我:「啲食物券喺邊度派㗎?」

我一於答返Briefing嗰時,阿頭叫我打嘅官腔:「先生,係同事隨機派發㗎。」

「咁即係喺邊度派?」

「同事會喺場內,每個角落遊走隨機派俾客人……」

我相信你問我阿頭,佢都答你唔到。因為派券嘅同事,係跟另一間Agent返工,咁首先要知係邊間Agent,之後要問返邊個阿頭負責,個阿頭再要打返電話俾佢條𡃁,問佢行咗去邊……

個男人好似聽唔明「隨機」係咩意思,繼續問:「咁佢而家喺邊個角落?」

「……總之唔係喺呢度派啦,同事會滿場走㗎。」

「咁佢即係行咗去邊呀而家?吓?」

呀生,我點知佢哋Whatsapp更新咗未啫,分享咗Location都唔輪到我睇啦!

我明嘅,其實佢都只係想我變張券俾佢,或者帶佢去攤位,再同同事講,呢個客好肚餓,唔理佢有冇券,求其俾啲嘢佢食先啦。

咁我真係冇呀嘛……我唯有答:「唔知,Random派㗎。」彷彿講英文會易明少少咁,話晒香港都係國際都會。

「個個都唔知!」

睇嚟唔止一個同事俾佢Chur過。

佢行開咗好幾步,仲大大聲話:「乜都唔知!冇人知嘅!」

……我淨係知出面轉角間麵包鋪幾蚊一個包囉。

(完)

Follow FB Page,睇文快一截 :D

短故
〈媽咪為咗晴晴,同獸父大戰!〉:https://goo.gl/rWU6Gz
〈問君何所欲?我要搵人幫我Hand Job!〉:https://goo.gl/zrcK1k

#余該隱 #鬼叫我炒散 #炒散 #會展 #展覽 #食客 #著數 #R著數 #廣東話好難明