樹洞報復！鬼叫你唔開心先諗起我！（４）
（１）：https://goo.gl/6Vt57S
（２）：https://goo.gl/W2Qgk9
（３）：https://goo.gl/AFbMsD
樹洞嘅角色，只係需要默默接收對方掉低嘅負能量，唔需要俾建議，最好唔好有自己。
如果周慕雲喺吳哥窟擺低件心事，會令蘇麗珍失驚無神彈返出嚟，咁成件事就錯晒。
呢度講，呢度散。邊個想呢頭同樹洞講完，嗰頭就同另一半散？
阿蚊望住我嘅眼神好驚，阿邦就笑得唔多自然，「你幾時對女人有興趣㗎？」
我嘅語氣變到有啲倔擂槌，「咪轉移話題啦，我問緊你，公司有冇靚女同事呀？」
「冇啦，全部都係中女。」
「咁兩個星期之前入職嗰個女人，係邊個嚟㗎？」
阿蚊一個咕𠱸掟埋嚟，「黎家家！你講咩呀？」
阿怡話：「你睇你，飲到醉晒喇。」
「轉一次淨係可以問一個問題咋嘛。」阿Fi即刻再轉樽，今次轉中阿怡。
但阿邦已經企咗起身，阿蚊唔知點算好，對眼幾乎想殺死我咁。
Rebecca大大力推咗我一下，細細聲話：「你玩咩啫，佢哋啲嘢咪由佢哋自己解決返囉。」
阿邦好平靜，喺抬面拎返部電話，開咗幅相俾阿蚊睇，「你講佢？」
阿蚊睇到眼都突埋出嚟，「希希？」
「阿妹佢唔想俾人知佢拉關係入我公司做，落咗Order連你都唔講得喎。事實證明咗，你梁家欣知嘅嘢，全世界都知啦。」
吓？乜咁峰迴路轉嘅？
阿邦冇咁好氣，「點呀？你同你班好姊姊仲有冇嘢問呀？」
出軌疑雲解決咗，阿蚊個心當堂定晒，即刻攬住阿邦Say Sorry。
我就好老尷，冇啦啦搞咗場大龍鳳，唔知為乜，「一早坦坦白白，搞清楚件事咪好囉。」
阿邦郁郁膊頭，忽然望向阿蚊，皺晒眉，「但我都冇同你講過我公司有新同事，你點知㗎？」
「呃……」
「Derek個八公話你知㗎呢？」
阿蚊點點頭，冇出聲。
「咪喇，Derek條死仔媾女咁掂，我要叫阿妹小心啲佢先得。」
Rebecca唔知好嬲定好笑，「喂！你頭先先話介紹我識㗎喎。」
阿邦舉高雙手，「咁你經驗豐富呀嘛，冇腳嘅雀仔有咩依郁，容乜易俾你搞到冇埋雀仔㗎。」但一講完，自然要捱幾下打。
我完全估唔到，件事會發展成咁。望住個吉酒樽，喉嚨一陣苦澀，忽然覺得，坦白啲講心嗰句，有咩好驚喎？大家吵吵鬧鬧，始終都係老友。
「不如轉中咗嗰個，要講一件心事？」
「Why Not？」
熄埋燈，幾乎睇唔清楚大家嘅面目。
樽口指住阿怡，到底佢會講咩呢？個樽幾時先會轉中我呀？
咁玩法，會唔會易啲開口講人生嘅難題呢？
或者樹洞真正嘅「報復」，係令其他人變成自己嘅樹洞。
（完）
寫呢隻故，原先係想埋下自己嘅心事，但玩玩下又幾開心，希望嚟緊可以寫出更多具唔同解讀方向嘅故嚟娛樂自己XD。
＝＝＝＝＝＝＝＝＝＝＝＝＝＝＝＝＝
主題曲：
〈樹洞的聲音〉（寄調：吳哥窟@吳雨霏 https://goo.gl/fsB9uE）
三杯酒過亦無用
亂語 哪吐出心裡沉重
張嘴了 喝苦水 喉嚨熱滿再淘空
望向酒樽 莫聽出樽內撩動
輕飄飄對話浮動
就快 說到中心那繁重
剛想說 卻給他 隨便截斷我話鋒
像過去般慢半拍須做岩洞
＊其實哪個察覺樹洞具心思敏感細膩
誰料我這對耳都渴望排去傷悲
卻要花足心機 長夜又等他講到膩
彷彿這裡只有他最悲＊
多珍惜我伴其右
愉快建構於不說難受
多深信我啞口
牙牙學語秘密守
大概我該合上嘴巴別輪候
重覆＊
其實我哪介意日夜為知己設身處地
明白當我摯友先卸下強悍低飛
再儲起他的悲 懷內像深海般儲備
苦水不吐反暢飲 醉死
