最近喺公園睇咗場象棋比賽,叫老王對決咁話。
場棋就完咗,但班圍觀者就喺度粗口橫飛咁討論個勝負結果,真係睇佢哋講野仲精彩過局棋。
咁嘅,紅一方叫星伯,黑一方叫河伯。
星伯呢期係好紅嘅,聽聞佢喺呢條天橋底下就未輸過,可能因為佢紅啦,所以引嚟好多原本都多唔多識捉棋嘅人嚟圍觀。
「有無搞x錯啊!盤棋都未捉完,點解垃圾星會贏?」
「係囉係囉,咁樣贏法好肉酸囉!」
「吓?佢食咗隻人哋隻『將』喎。」
「吓!都未食哂啲棋!而且好明顯河伯剩返棋嘅數目多個星伯啦!你睇清楚啦,人哋車馬炮都喺度呀!星伯得返隻車同隻兵,弱到咁?咁都算佢贏?成班夾埋造馬!」
「係囉係囉,咁樣贏法好肉酸囉!」
「但象棋玩法唔係咁,食咗人哋個『將』就贏架啦!」
「x!我而家唔係x緊造唔造馬囉!所以我由頭到尾都係x緊個象棋制度!」
「係囉係囉,個制度根本有問題!」
「x!呢個係幾百年嚟定下嘅規則嚟!輸咗瀨個規則?」
「唔x得個象棋制度即係唔x得個基本法呀?!你奶共呀?唔駛遊行啦!」
「係囉係囉,盲撐x!奶共者!保皇黨!」
「咁……咁河伯都係知道咗象棋玩法先玩嘅!」
「你咁講即係話基本法不公,叫我去移民啦!我而家講緊呢個決定勝負嘅方式具有爭議性啊!咁玩法其實對某類鐘意食哂對方棋嘅棋手嚟講好唔公平架!」
「係囉係囉!」
「嗯……咁……好似又係……」
其實我都無再聽落去,因為我覺得呢個根本就係中國幾千幾百年前種落嚟嘅禍根,可能問題根本無啱同錯,又,可能一切都係土地問題!
最近,我喺討論區好似見到差唔多嘅討論,好似係講緊拳賽。