首先我講明清楚，我唔係針對某宗教（不過我都認同，某宗教係特別多呢種人）
宗教信仰對我黎講好似食飯嗌餸，你鍾意食蟲食蛇食素係你自由，我唔鍾意食就係唔鍾意食，唔使咩原因。
我尊重你，唔介意同你同檯食飯，你有你食蟲，我有我吃菜，無所謂。
但你係都要問我：
「點解你要唔食先？」
「你有咩證明到俾我睇，你唔食係一定有益過食？」
「其實好多人依家都會食喎！」
最有印象嘅超級宗教狂熱份子一定係中五畢業後，玩活動識得嘅女仔 － 惠琪
（後來佢好成功咁去做咗一個幾多人識嘅演員）
惠琪係個靚女，我都中過毒，差啲入埋伍。令我清醒返黎嘅就係佢呢種狂熱宗教理論。
「呢個世界係有完美！」
「我地最終都會返到去主嘅身邊。」
「你要記住，你都係主嘅僕人，只不過你係迷失咗姐。」
如果你女神講得出以上說話，你又感到反感，但都仲要入伍，你有極嚴重嘅自殘傾向。
都係個句，宗教未必有問題，有問題多數係啲人。
不過有問題點止係惠琪丫。
每次我同佢傾到點解有十字軍，點解唔信主就要落地獄，佢就激到紅都面哂，有次仲要比我搞到佢喊。基本上你每次同呢班宗教者去討論，點解要跟你個套，佢地啲理論都係好好笑。
「你話證明唔到佢存在，但係你都證明唔到佢唔存在架啵！」
不過如果個個係你老闆，你一定笑唔出。
明哥係青年中心主管。當時我入去做，可以話係嘆到不得了，基本上係無工作可言，每日最大嘅挑戰就係點樣可以扮有做野，同埋應付明哥嘅推銷。
明哥就係頭先以上金句嘅發明者，我真係諗好耐，究竟明哥用咗幾多時間去拆解呢條咁荒謬嘅邏輯題？我當時真係比佢拋窒：「你究竟Up乜春呀？」
呢句說話真係幾無敵：
Miss！你話我證明唔到我份功課存在，但係你都證明唔到佢唔存在架啵！？
老婆！你話我證明唔到個第三者存在，但係你都證明唔到佢唔存在架啵！？
特首！你話證明唔到你嘅僭建物存在，但係你都證明唔到佢唔存在架啵！？
無，我無咁講，因為我怕明哥同我講：
「你話證明唔到你份人工存在，但係你都證明唔到佢唔存在架啵！？」
咁咪要去教會陪下明哥囉，然後又講下去完有咩感受，扮到好熱情咁囉。
不過呢種都係普通料，我呀媽先係最大嘅危機。
呀媽出身農村家庭，扮神扮佛，有得拜佢都會去拜，唔理你咩神，總之同我拜咗先，由細到大佢係咁教我，因此我飲過好多符水，係真真正正黃色紙，上面用紅字水彩鬼畫符然後燒成灰燼再混入清水嘅符水。
就算你點解釋佢都係個句：
「你唔識咁多野架啦，同我飲咗佢！唔好咁多廢話」
直到我聽講如果你信左耶穌，你就可以大條道理咁同呀媽講唔去拜乜拜物，我個刻真係有啲衝動咁跟返呀穌哥，我小一同小六我都係跟過你架啦。
利申：我細個都係讀天主教小學，宗教都拎幾高分。
對我黎講，每次見到呢類型宗教狂熱份子我都避得就避，個原理等同我每次收到有朋友話就走Ｑ左去做理財策劃咁。
得閒飲茶。
