當愛情腐壞,臭氣沖天。不但止唔想聞,聽都唔想聽。

上回講到呀蛋分手數個月仍然耿耿於懷,到最近先至開放少少。尋晚係GYM ROOM傾計,又係到扭計,不過今次係扭我計。
詳情參見《想個女人等你,你要問下點解佢要等你》

「你唔係唔撐我嘅咩?」呀蛋嬲嬲豬咁問

「我只係用一個新角度去令你釋懷姐。」

「你覺得我份人小氣丫嘛!」呀蛋扁哂咀咁,真係頂佢唔順。

「事實係,但又如何?我都係,好多人都係,重要咩?」

【分手規則】
好多人話「再見亦是朋友」,反之你達唔到呢個觀念,你就係一個差勁嘅人。困苦係呢個概念嘅人又何止呀蛋一個。
當日同女友分手,我仍然依依不捨,幻想住有日可以同佢再次係返埋一齊。
但事實係,佢根本唔當係咩一回事。因此我電話刪除,將所有關佢嘅野都扔哂。

「大方啲,做男人唔可以乜乜乜」
「都過左咁耐,你仲使唔使咁」
「算啦,人地都有第二個」
我聽唔入耳,我腦裡有種千種理由去反駁呢種說話,但我無講出黎。我尊重朋友,某程度上呢啲建議都係為我好。

為左迎合呢種觀念,我好努力去同佢見面,即使每次我都係痛苦底下強顏歡笑。

然後大家都會為我呢種「大方」嘅行為而鼓掌,但我唔得。
我感覺得自己有如拎把刀每日都插自己一下,然後大叫好爽。
好變態,亦好病態。

【坦白自己】
「接受你自己嘅不滿同悲傷,先係你最快釋懷嘅辦法。」

呀蛋沉默一陣又想駁咀

「唔好同我講話無野,無野只係適用於兩種人:一,根本對人連小小感情都無動過嘅人;二,當你真正再次回想起都唔會再覺得痛,真正釋懷嘅人。」

呀蛋嘆一口氣:「其實我唔甘心,又覺得好可惜。」

「愛情本來就唔係一件完美無暇嘅事,有遺憾係正常,接受自己嘅情緒先係最好嘅解決方法。
唔想搵佢,咪唔好搵,唔想見佢,咪唔好見,你唔鍾意我提佢,我可以唔提。你要記得自己感受先係最重要。去做覺得可以令自己舒服嘅事。
小氣咪小氣囉,記仇咪記仇囉,人又唔老馮要大方對所有人。」

佢無再出聲,我亦繼續做掌上壓。
我望自己地上嘅汗,同我當日流嘅眼淚一樣咁多,不過今日我望住自己,更覺得舒暢。鏡入面嘅人,我欣賞佢流汗多過流眼淚。