「人生無常嘛,如果你肯投保呢個計劃我肯定「未亡人」呢件事一定唔會發生係你身上。」

係我同保險經紀羅先生訪問期間,佢仍然忍唔住不斷向我銷售商品,職業病。

「唉。依家做呢行真係唔易架,個個都知道自己幾時死,搞到個個都唔怕死;最怕就係做「未亡人」。但「未亡人」呢樣野有幾多錢都無搞唔掂。」

羅先生未做經紀之前係做建築工人。
而做建築工人嘅多數都係「短命」先去做:因為一個不留意,就會變成「未亡人」;「短命」就唔怕,頂多辛苦多一兩年。
建築商亦好喜歡請呢種人,貪佢地夠短命,唔使賠咁多錢,變相佢地可以拎嘅人工亦都比其他人較多。識計數就無死錯人,全個社會都係咁,所以越高危嘅工作亦係「短命」人嘅首選。

「但我足足有成83歲命!個陣個個都唔肯請我,好在我夠勤力又識多啲字,呢行都係難得人才!哈哈!」羅先生總係喜歡呢種無聊嘅自誇。

事實係佢係其他行業搵唔到食,唯有焗住入行。

「但我想問,點解你會咁突然又轉行呢?」其實我心裡有數。

佢又繼續係自誇又話有人帶令佢明白乜乜物物,做保險呢行又可以幫到人乜乜乜,講到尾咪又係為左搵錢。

「信我,你幫我買呢份投保計劃我就會介紹多啲唔同類型嘅人比你!等你本書早啲完成好唔好先!?等我睇下你個計時器先…….嘩!有啲長,不過唔緊要,我仲有其他計劃岩你!」

唉。
我竟然簽咗名,世界點變都好,但人類嘅貪婪真係永遠都唔會變。