我係一個普普通通既打工仔,每日返早收夜就一日。

依種生活唔係我想去習慣,而係被迫住去習慣。

以前細個時間總係好充足,想做咩就做咩,每日放左學就係自己既私人時間。

人愈大就會慢慢覺得時間唔夠用,返工做餐死,放工一係無時間用私人野,一係就攰到有心無力。

細個就想快啲長大,長大就想變返細個,我諗每個人既思想都係咁,可能有啲成功人士都唔係咁諗。

因為大個左思想成熟左就會覺得自己生存係依個世界只係好渺小。

加上出到黎社會就會體驗到人性既醜惡,唔似細個既時候,每個朋友都天真無邪。

今日係星期五,唯一一日有得放早,每逢星期五我放工都會返去父母屋企。

為既係飲阿媽煲既靚湯,最主要其實係暫時逃離依個繁忙既市區。

我父母住係比較偏僻既村屋,依到亦係我細個既屋企。

以前就厭依到離市區太遠好唔方便,大個就覺得依個係一個好處,對我黎講。

落車之後行一段路就返到黎,依個平靜到可以比我冷靜下頭腦,享受下新鮮既空氣。

遠處望返屋企已經見到阿媽已經開定門等我。

入到屋企已經聞到一陣陣香撲既餸菜味。

阿爸同阿媽一早準備好哂飯餸等緊我返到黎。

「返工返成點呀?係唔係仲好攞命呀?」阿爸問我

「唔係呀,依排輕鬆左唔算太辛苦。」我廢事阿爸阿媽擔心講左個大話

「咁就好啦,你知你架啦份人咁唔捱得,做咁多野我驚你頂唔順。」阿媽亦都加把口

「講依啲,我依家不知幾生猛。」我講

「係啦係啦,食多啲餸啦。」阿媽聽完得啖笑

食飯既時候我望到阿爸阿阿媽多左幾條皺紋,唔知係我太耐無認真望過佢地定我錯覺。

食完飯飲完湯之後我就出左外面坐下。

唔知係唔係因為郊區既關係,依到比起市區更容易睇到星星。

定抑或係平時我地忙到連望下天上面既星星都無時間?

望住依片星空令到我諗番起細個日日放學就無憂無慮周圍玩。

諗下諗下搞到眼濕濕,真係好想番到以前享受下或者改變錯過左既野.......

望多左一陣我就番入屋企,入到去見到阿爸同阿媽係到睇緊舊陣時既相。

「呀仔阿呀仔過黎一齊睇下。」阿媽叫我過去

「你仲記唔記我你細個既時候好鬼死似女仔?」阿媽笑住問我

「緊係記得啦,我仲記得我有一次去買幼稚園校服,個阿嬸問我要幾多條裙。」我激動咁講

阿爸阿阿媽亦都笑左出黎。

過左陣佢地兩個就眼訓去左訓覺先。

大廳得返我一個係到睇相,我一張又一張睇,我留意到有一set係阿爸同阿媽結婚前相既。

係我未出世之前佢地成日去唔同地方旅行,佢地兩個好sweet咁去到邊影到邊。

見到佢地年輕時候既相我睇到有啲眼濕濕,歲月不留人.......

跟住就係我一系列既個人成長特寫,老實講我個樣由細到大都無咩點變,只係愈大就似番個男仔。

依一刻我既眼淚終於忍唔住流左出黎,眼前既相亦都愈黎愈朦糊。

我用手刷乾眼淚,但比眼前既景象嚇到。

依一刻我係一個旁外人,係隔離望住父母年輕一齊既時光。

當我行埋去叫佢地,但佢地竟然完完全全睇唔到我,依一刻我做左一個透明人。

當我發現左依一點之後我就企係一邊睇住佢地。

我眼前既景象轉得好快,佢地去完一個又一個既國家。

直到番到黎香港,正常我應該係依個時候出世,但我竟然無出到世,甚至阿媽亦都無懷孕。

我非常之驚訝,究竟發生緊咩事。

我眼前既景象無停止到,我無出世令到好多事情都變左好多。

阿爸唔洗就我返學而升職,每月人工多過依家幾倍。

而阿媽亦都唔洗照顧我而可以做自己鐘意做既野。

佢地既生活充實同開心左,而隨住時間既過去,佢地連皺紋都無。

兩個人過住幸福既日子,連我亦都無存在過係依個世界。

正當我非常沮喪想大叫既時候,我眼前突然一黑。

映入眼簾既係我真正既父母,佢地同我講左一句令到我攬住佢地喊到收唔到聲。

我比朝早既蟬叫聲嘈醒左,原來頭先所有野都係夢,我仲訓左係堆相隔離。

但唔知幾時多左張被係我身上面。

依個時候阿媽行出黎:

「睇睇下相都可以訓著既,係唔係咁攰呀你?」

依一刻我既眼淚又忍唔住流左出黎。

「講下笑啫,洗唔洗喊呀,傻仔。」阿媽行埋黎攬住我

係夢境裏面,阿爸同阿媽講既一句野係:

「有你係我地身邊先至係最幸福。」