驢呢種生物,同馬,牛好有好大分別,最大分別在於驢唔識得表達自己,亦唔知道自己極限可以去到幾多,簡單啲黎講就真係蠢才一個,只要有食物佢就會繼續工作。因此,呢條村入面嘅人都特別鍾意養驢,貪佢夠性價比夠高。

陳氏每日都會叫自己隻驢拉五斤柴,完成工作之後就會比兩條蘿蔔比佢食;隔離黃氏見到陳氏隻驢每日可以拉五斤柴,而自己隻驢每日都係拉得三斤,所以第二日就加大咗份量,比驢拉足八斤柴。驢覺得特別累,所以黃氏比咗四條蘿蔔比佢食,驢見有野食亦無怨言,第二日繼續拉八斤柴。

張氏見到黃氏嘅驢每日拉八斤柴,只吃四條蘿蔔,覺得條自己隻驢每日雖然拉十斤柴,但要吃十條蘿蔔,覺得有啲唔抵,所以由今日起只係比驢食八條蘿蔔,驢覺得有得食已經夠,亦無扭檸,繼續拉十斤柴食八條蘿蔔。

慢慢村入面就引起一股風氣,每家每戶都會鬥自己屋企隻驢有幾叻,拉到幾多斤柴,少食幾多蘿蔔。

唔夠一年,村入面嘅驢已經識得十八般武藝,跳火圈,行鋼線等等。村民為咗令到驢成長得更快,就從幼驢時就迫佢學習更多技能,慕求令到家驢可以更快達到高水平。

三年後呢條村嘅驢變得相當出名,好多人紛紛過黎睇下呢班咁有才華嘅驢,同時令到村民賺得到更多錢同埋面子,村民有見及此,催谷訓練家驢就變本加厲。

未出世就已經準備訓練計畫,係子宮入面比音樂佢地聽,訓練方法千奇百怪。

村民每日都會拎自己屋企最叻嘅驢黎互相哂命,而表現得比較平庸嘅驢就會比村民責備,話佢地「坨衰家」。

五年後,有位旅行家黎到呢條村,本來想一睹「驢」的風彩,但入村後只見愁雲慘霧。旅行家打聽後先知道原來村民迫驢學習,迫得太緊要,二年前已經有驢受唔住壓力跳河自殺,村民都唔太在意只覺得自殺嘅驢實在太廢,「訓驢計畫」有增無減,直到半年前大部份嘅驢都自殺後,村入面生產力大減先至知恨錯難返。

但只有一隻驢幸免於難,就係陳氏屋企隻驢。旅行家詢問陳氏,陳氏笑笑口:

「我屋企隻驢唔識跳火圈,行鋼線,但每日食得訓得,五年前佢只可以拉五斤柴,今日佢已經可以拉到二十斤柴,再加埋我全家人。我知道我屋企隻驢比較單純,迫佢學習太多亦都無意思,所以只可以陪佢一齊成長。」

陳氏亦成為村入面唯一有驢嘅家庭,亦都係唯一快樂嘅家庭。