我並無理會輝叔既憤怒，而係開始係到諗，我要點樣先可以開始我既食大茶飯計劃。

係咖啡因既作用下，
我靈光一乍，係一個名，依個名就係搞屎雄。

搞屎雄就係葉繼歡同張子強背後既男人。
佢曾經幫葉繼歡同張子強做過野，可以話無搞屎雄既話，佢地唔會有今時今日咁既地位。

聽講依家佢都撈得唔錯，住洋樓，養番狗，結埋婚。

我快快脆，食埋個包，飲埋杯茶，埋個單，
再老笠個人賺番d車馬費先至去老蘭。

夜晚既老蘭充滿一種難以形容既味道，唔知係個D鬼佬獨特既體味定係D港女hi大完唔記得沖涼既味道，抑或其實只係酒既氣味。

我去咗搞屎雄間夜總會。
夜總會門口，排左成堆人，等緊下一場。
門口企阻兩個戴住黑超同阿諾舒華辛力加咁上下既大隻佬。

我諗食大茶飯，實可以行使特權，唔晒排咁耐隊。
點知我行過去同個大隻佬講︰「我係黎食大茶飯。」
佢不但唔比我入去，又用沙煲咁大個拳頭威脅我，仲唔知係味係度用同我講普通話。

好似係咩︰「油！甲嘔。」(You！get out)

我死死氣咁行去個條好似離我有十萬里遠既隊尾。

我一路行，一路觀察排緊隊既人，有mk仔，有mk妹，又有D牛高馬大既。

其中一條友面目猙獰，個look好似D古惑仔，著住件黑背心，左手既手臀刻咗條青龍，右手係一隻白虎，我認定依條友一定都想食大茶飯，等陣一定要搵埋佢分一杯羹。

等左差唔多半個鐘，條隊陏了。

我辛辛苦苦由隊尾排到門口既位置。

點知阿諾舒華辛力加又唔比我入去。
佢指住我件衫話咩︰「諾諾諾。」(NONONO)
身為一個大陸落黎既專業賊佬，我當然無著得好顯眼，
我係著咗件格仔襯衫，同埋一條闊腳牛仔褲。

無理由喎。唔通我個look唔夠pro？惟有去改變一下。

睇住黎啦，舒華辛力加，I will be back。

我去咗附近個間寫住h&m既店鋪。
入去買左件黑皮褸，窄身黑皮褲，戴埋副黑超，個look即刻成個未來戰士咁。

我返去阿諾舒華辛力加個度。
佢好似比我依身既造型嚇呆左。我不禁覺得威風凜凜，亦感嘆世態炎涼，原來出黎行個look真係咁重要。

無論如何，我終於順利入咗夜總會。

入面環境黯淡，空間幾闊落。
中間有一個舞池，舞池地板會不斷閃下閃下，為上面既舞者增添唔少氣氛。
側邊有一d檯檯櫈櫈。

後面係bar枱，有個調酒師企阻係度抺杯，佢着咗件西裝背心，
樣貌都幾靚仔。
我穿過中間令人喘氣既人群，行到吧枱度套料。

「喂，瀨屎雄係邊到？」我脫口而出。

調酒師表情怔一怔。
睇見佢既表情，我先發現自己講錯野。

即刻改番口。
「Sor、Sor、Sor，大佬。」
「係搞屎雄先岩。」

調酒師帶咗我去側邊走廊，行到最尾一間房。
佢敲起門。
「入黎。」我聽到一把年老既聲音，夾集一d女既歡愉聲音。

打開門，發現係一間k房。
房中間係一張矮小既長方枱，靠牆個邊係長既連身梳化，一男兩女坐係度。
男既當然就係搞屎雄。佢成個黃毓民咁。

戴住墨鏡，口含住條雪茄。

穿住件白色老西，同我既打扮形成一個強烈黑白對比。

佢左擁右抱隔離d女。

女既穿住係一紅一黃，都係坦胸露臂。

「坦胸，露臂，你地出一出去先。」搞屎雄話。
真係名乎其實。

房靜番搞屎雄係到。
「搵我咩事？」

我依家先發現，枱上面有d白色既粉末。
相信係佢未抹乾淨張枱，因而留低既塵末。

「我想食大茶飯。」我坦言。

佢忽然唔知係邊道攞左張紅衫魚出黎，一手捲起佢。
另一手用張卡張d白色既粉末排成一條直線。

佢擔住枝雪茄，
一起勁用張紅衫魚吸晒枱上面d白塵。

搞屎雄，真係一條好漢。
塵都鐘意食。

跟住佢好似high大左，哈哈大笑。
「從來只有我去搵人食大茶飯，無人會搵我食大茶飯。」
「見你咁勇，比個機會你。」
「你想食咩大茶飯？金魚佬？毒販？水貨客……」
搞屎雄不斷講出唔同既大茶飯，

我feel到我塊臉越來越白，越來越似冷酷既T-800。

植入式作者的話:
小弟平生無咩叻，最叻係道FFd故仔，
如果鍾意我既作品，歡迎黎我既專頁 ​
https://www.facebook.com/graylittledog/
比我一個Like，比我知道你既支持，比我有更大既動力去創作。

想睇我其他作品，或者想追故仔最新既動向可以去依道
https://www.shikoto.com/author/11830/灰色小狗.html