首先唔禮貌咁講句,如果你認得呢個封面係邊一齣電視劇咁你年齡都應應該有翻咁上下。
如果你唔知,呢套戲叫做《當四葉草碰上劍尖時》,係我印像中TVB唯一一套真正意義上嘅校園偶像劇。而佢亦好可能係我最鍾意嘅偶像劇。除左因為佢算係我童年嘅一部分之餘,仲有係因為佢真係令我嚮往高中嘅生活,好想重讀高中改變一切。
平時睇偶像劇我都唔會有咩感覺,因為情節誇張令我根本關聯唔到劇情。但四葉草唔同嘅地方係,高中呢樣野係大部份人一生裡面都會經歷嘅階段。
所以就算劇情幾狗血,主角光環有幾強都好,你都會有種想進入嗰個世界嘅衝動。
我幾個月前突然睇翻呢齣野,之後我就間唔中都會捻,點解我嘅高中生涯差咁多?
我好好奇係現實生活究竟有無人可以過到偶像劇入面咁嘅生活?有嘅唔該教下我點先可以做到。
我捻呢種感覺應該唔只我一個人有。最慘嘅係每次聽首主題曲果種好正面積極嘅能量嘅時候,都會好想有人同我分享嗰種能量同感覺。
但可惜我永遠都係一個人聽,唔係我無朋友,而係我好難搵到一個能夠同我share呢種感覺嘅人。特別係因為係外國嘅關係,根本唔會有人明白。
唔知係咪我特別鍾情廣東話,係外國住咁耐我始終比較鍾意聽廣東歌。雖然外國歌都會聽,但就係無嗰種親切感。
雖然我覺得香港教育制度真係好有問題,但我依然覺得會考係值得保留嘅野。因為會考呢啲野,係嗰個年齡就只得一次。20歲再走去考個感覺已經唔一樣,莫講話20打後。
試捻下如果無左會考嘅制度,高中嗰陣就唔洗溫書。男子可能會日日同friend打機,女仔就一大班friend走去shopping睇戲食飯打卡。
但同friend打機shopping睇戲食飯打卡呢啲野,咩年齡做感覺都唔會有太大差別。但會考呢樣野,同同學一齊搏殺溫書嘅經歷,就只有係嗰個年齡先會有嗰種感覺。而我就從來未試過。