我叫軒少,屋企好有錢,富二代係有好多優勢,但愛情路就一啲都唔平坦。
好多女人主動獻身,我都照單全收,但就係無果種愛嘅感覺。
電視劇都有講,我呢種少爺仔,係要撞車失憶、流落民間,先會搵到果個唔貪慕虛榮嘅真命天女。
但我無理由為咗搵真愛而撞車架,我都控制唔到,撞到咩程度會失憶,所以我只好接受現實。

我以為我會孤獨終老,點知喺一個月黑風高嘅晚上,我開跑車撞到個阿伯。
我岩岩拎咗疊銀紙出黎,諗住賠醫藥費畀佢,
佢就講:「後生仔,見你架跑車咁有型,我可以畀三個願望你。」
乜通常神仙賜三個願望,唔係應該講「見你咁好心」、「見你救咗我」架咩?
時代進步咗,跑車有型都可以有願望?
「不過我係月老,所以願望必須同愛情有關。」
我答得爽快:「我希望,聽日,我會見到我命中注定嘅另一半。」

我點會信佢係月老,梗係唔會講「我想要二千個裸女服侍我」啦,呢個答案就最穩陣,就算佢係狗仔隊都唔會出事。
阿伯點點頭,拎走我手上疊銀紙,就走咗。

第二日,我老豆同我講,佢打算要我,同另一家公司嘅太子女聯姻,今晚畀我地相睇下。
唔通個願望真係有用?我滿心歡喜,Gel到個頭豎晒咁去相睇。
點知太子女居然係個醜女,食飯食到一半,我忍唔住借尿遁,去廁所打畀老豆:「你知唔知個女仔幾醜樣?」
「熄咗燈一樣啫。」
「老豆,貪平娶醜婦,代代醜兒孫啊!」
「可以人工受孕架,再唔係你喺出面生三五七個囉。呢場聯姻對我地公司好有幫助......」
講到最後,我老豆居然用遺產繼承權,威脅我同太子女相處下。

我好灰心,一收線,就見到個阿伯企喺我隔離,笑瞇瞇咁問:「點啊,見到命中注定嘅另一半未?」
我開始信佢係神仙,仲要係賤格、鍾意整蠱人果種。
「咁醜樣,我點會愛上佢?唔通佢好有內涵?」我大吐苦水:「就算佢好有內涵,但『外涵』咁差,我邊有心情了解佢內涵?」

「無人話你會愛上佢,不過根據姻緣簿,你會娶佢。」月老攤手:「結婚還結婚,愛還愛,無必然關係,好多人做一世夫妻都唔愛。」
「咁我就一定要娶個醜女?」我就黎想喊。
月老意味深長咁答:「如果無我,你就走唔甩......」

係啵,我仲有兩個願望,我即刻想許願,話要老豆唔逼我娶個太子女。
但諗一諗,唔娶呢個,仲有第個太子女架啫,咪浪費咗個願望。
就算老豆唔逼我,我自己搵,都未必搵到真愛。
所以,我應該利用第二個願望,搵到真愛先;再用第三個願望,令我地開花結果。
咁第二個願望應該點講?講「我要真愛」?
萬一個真愛又好醜樣,我只係中咗邪咁愛佢,點算?都係自己揀穩陣啲。

「我唔會咁自私,剩係用願望為自己服務。」我義正詞嚴咁講:「我見依加啲女人一係就貪錢,一係就貪靚仔,我覺得呢個風氣好差。
所以,我嘅第二個願望,係天下間嘅女人,都唔會再被物質同外表吸引!」
嘩,講完我都覺得自己好偉大。
女人唔再貪慕虛榮,咁我只要揀個靚嘅,就已經係我心目中嘅灰姑娘啦。
月老點頭,問我攞咗兩萬蚊「手續費」,又消失咗。

下集:https://post.shikoto.com/posts/128585-月老畀三個願望我(下)