劉仲文（1935-2006），相入面個個就係呀公，佢係10年前已經死左？
老豆同細佬見我企左係個墓前咁耐，行左過嚟。
細佬震驚咁問：「呢個係呀公？」
我點點頭。
「咁媽咪呢10年黎，每晚打電話比邊個？我地尋日見到個個又係邊個？媽咪係咪癲左？」細佬眼泛淚光咁講。
「我唔知！」我無奈咁答。
而旁邊既老豆就顯得有啲唔耐煩，講：「仲望咩望，快x啲去搵佢地啦！麻x煩！」
我不屑咁問：「去邊搵？」我最憎就係我老豆呢種態度，每次問題出現，只係識躁底，無助解決問題不得止，仲令到氣氛更差。以往係屋企，我地唔想同佢噪都會唔出聲，由佢。但而家咁既關頭，佢都咁既樣，真係令我好嬲！
「唔係點呀？你呀媽都唔知做物9，你個妹又唔x聽電話！」
又係咁又係咁！點解我老豆份人咁樣！我真係忍唔住。
「你收聲啦你！而家攪成咁全部都怪你！都怪你呀！」我好嬲咁鬧出黎。
「衰仔！你傻x左呀？」平時雖然成日聽佢講粗口，但而家聽落特別"銀"耳。
老豆好嬲，但無言以對，上返的士走左。望住遠走既的士，我知道老豆只係需要靜下。我知道我咁樣講，好傷佢個心，但我講既都係事實。我知道，老豆每日都會提媽咪打比呀公，而且媽咪寄幾多錢返娘家，佢都從來唔過問。老豆用自己既方式去對媽咪好，但佢並唔知道媽咪最需要啲咩！
「嗚⋯呀哥！咁點算呀？媽咪係咪真係癲左呀？」細佬繼續喊住咁問。
「唔係！尋日，我地一家人都確切咁見到呀公同埋個條村既村民。但我地而家都搵唔返個個地方，我假設佢地入左異空間。」我一面講，一面睇周圍既墓，上面既相中人都好似係村入面見過，既然村入面個啲人其實都已經死左，咁個個空間就係比亡者既空間。既然個日我地入到去，又出得返黎，咁我地而家都一定可以搵到方法入去。我係心入面一路推理。
咁究竟入去既方法係咩？而家我地已經到左個日去到既地方，但就入唔到去個個空間。我望一望隻錶，而家係上午11點，唔同關鍵係時間？尋日我地下午4點先到呢到。既然時間可能係進入異空間既關鍵，我就決定坐係到等答案。
此時，遠處駛黎一架的士，老豆落左車，細路同佢講左我既推理，於是佢坐埋係到同我地一齊等。老豆既態度好左好多，可能岩岩有反省過，其實我都唔係真係想怪佢，我岩岩都有啲衝動。於是，我地都帶啲尷尬靜靜地咁係到等。我心入面亦都默念：細妹，希望你發現到你身處既地方係異空間啦！
以上為呀哥角度
以下為呀妹角度
「媽咪，不如我地出去搵佢地啦？佢地咁耐都未入黎，呀哥手機又打唔通，可能唔認得路，唔識入黎呀！」我擔心咁講。
但媽咪就笑住咁講：「你放一萬個心啦！你老豆認路最叻架啦！佢地係出面行耐左啫，等多陣啦！」
媽咪咁講，咁我唯有繼續等啦！
農村雖然環境靚，但行左成日我都悶啦！我一個人返左屋企玩下手機，再打算瞓下晏就覺。由媽咪自己周圍搵親戚傾計。我係呀公屋企瞓到朦朦朧朧之間聽到有人傾計既聲音。我起左身，發覺聲音來自呀公間房。
「老公！今晚就叫佢地返去啦！佢地留得越耐越危險！」
「嗯！雖然我都想佢陪多我一陣，但我會叫佢走架啦！」
一把聲係呀公既，我好奇另一個係邊個，就敲呀公房門。呀公一打開門，入面得佢一個，間房一目了然，冇其他人。
「呀公！岩岩我好似聽到你同人傾計既？」
呀公笑笑講：「我岩岩開左電視，係電視聲啫！」
於是，我走左去搵媽咪，心諗有冇咁好傾，咁耐都唔返黎，唔知呀哥佢地入返黎未呢？當我到去門口，我就見到媽咪岩岩返入黎，但表情有啲慌張！
「咩事呀？媽咪，咁既樣既？」
「冇野！冇野！」但佢個樣顯然係有啲野。
「講啦！講呀！」我逼媽咪講。
「你唔好講出去呀！我咪同你講過你呀公有個朋友過左身既，但我岩岩見到佢，仲同自己在生既老婆傾計。」
我聽完嚇到呆左，之後我又諗起係呀公門口聽到既個番對話。
我冇同到媽咪講，但我即刻提議我媽咪一齊出去搵呀哥。媽咪始終唔想出去，但我好堅持。
「出去搵佢地呀！而家成4點啦！佢地都未入到黎！你都唔擔心佢地既咩？」我嬲嬲地咁講。
媽咪逼於無奈咁同我一齊走，我執好野就同媽咪行出村。一路行，啲村民都好熱情咁問我地去邊，我媽咪就笑住咁答我地出去搵老豆佢地。
行到接近村口，有一班村民堵住左我地，我就知道件事冇咁簡單。村民知道我地要出去搵老豆，好熱情咁話開車出去接佢地，叫我地唔使出去。媽咪婉拒，但啲村民依然好熱情咁話幫我地接，正當媽咪要應承既時候，我黑面咁講左句：「都話唔使！我要出去搵佢地！」因為我覺得佢地既熱情係別有所圖。媽咪聽到我語氣咁差，推左推我，再同啲村民講：「唔好意思呀！細路女脾氣！」
「等我地幫你地接佢地入黎啦！你地唔好出去啦！」
我已經忍耐到極點，拉住媽咪，發嬲咁講：「我要出去！即刻！」
媽咪見我咁堅持，再婉拒村民既提議：「唔好意思呀！唔使麻煩你地啦！我地自己出去接啦！」
但啲村民既臉色突然全部沉曬落黎，其中一個仲對住我地講：
「唔准走！你地唔走得！」
待續～
有興趣可讚黑柴Facebook
https://www.facebook.com/黑柴-879053098899020
