［真人真事］醫院奇遇

話說前排整親隻手，近日去醫院覆診，遇到件令我會心微笑嘅事。

我諗大家都知，係公立醫院無論排急症定係覆診，一等，就等到天荒地老。

礙於要等聽佢個咪嗌名，我唔敢開歌聽。

少左歌曲呢個排遣時間嘅渠道，咁我唯有放耳四周。

後面有一對七十歲左右嘅公公婆婆，令我印象深刻。

「喂，尋晚條魚，有啲腥喎。」公公咁講。
「哎，新鮮呀呢啲……」婆婆咁答。

雖則我完全唔明白新鮮同腥之間嘅關係……

「喂，今晚想食咩。」婆婆咁問。
「你話事啦……」公公咁答。

又隔左一陣。

「喂，你聽唔聽歌。」個公公拎出電話插上耳機，遞比婆婆問。
「唔鬼聽，最憎隻耳仔塞住野。」婆婆推開佢隻手。
「你聽下先啦！」公公堅持。
呢個時候婆婆勉為其難載上一邊耳機。
「好唔好聽呀？」公公問。
「幾好咁啦。」婆婆答。
「我唱架！」公公再講。
「搵鬼信咩！你邊有咁好聽呀！」婆婆質疑。
「唔信我唱比你聽丫！」講完之後，公公就開始唱歌。

個首係咩歌，我唔知，但佢真係唱得幾大聲下。

至少，坐係佢地後面個行嘅我都聽得好清楚。

「咪鬼唱啦你，仲咁鬼大聲，人地聽到架！」

公公無理佢，繼續唱。

「唉哋，好心你咪鬼唱啦，唔知醜！」婆婆語氣中明顯表現出佢有啲慌張。

公公依然無理佢，繼續唱多兩句。

我諗，大概唱左三十秒左右。

「咁你信未？」公公笑住問婆婆。
「係喇係喇，好心你咪鬼咁招積啦，嘈到人喇……」婆婆好靦腆咁答。

之後呢對公公婆婆仲好間歇性咁講左好多無營養嘅對話，我都唔係記得咁清楚。

但望住佢兩個嘅背影，我覺得幸福滿溢。

搵一個自己全心全意愛嘅人，同佢廝守一生，享受簡簡單單嘅幸福。

到老左有啲小病痛嘅時候，陪住對方睇醫生，等急症。