點解要讀城大?
貪佢排名高可以打飛機?貪佢近又一城?定係真心膠覺得Shitty已經係新三大?
講真,咪又係入唔到三大先入咗城大...
無論你係放榜之前已經揀定,定係因為成績低過自己expectation而轉科,都係同一個命運—入咗一個離奇荒誕嘅大學。

有時真係會諗,呢間大學根本唔值呢個排名,都唔值咁多外來生趨之若騖。
campus細唔在講,次次紅雨成個AC1變咗水舞間,扶手電梯成日壞,體育館冧天花,最近仲有扶手杆突然斷咗。
日日返學好似去緊大陸鄉村啲危樓返學咁,隨時隨地都有生命危險,真係痴撚線。

一間學校如果連師生嘅人身安全都保障唔到,好失敗。

一間學校最重要嘅係學生,但係城大嘅學生偏偏就係最荒誕。
大部份人對政治不聞不問,覺得呢個社會咩問題都無,吃喝玩樂就係佢哋生命嘅全部。
讀政政嘅人可以唔參與政治,上大莊嘅人可以冇政治理念,呢個就係城大。
確實,係有一小部份人會去了解呢個社會嘅,甚至仲有人係抱持堅定政治立場,但係唔多囉。
有好多人會問,唔理政治咪唔理政治囉,有咩所謂?
又真係無咩所謂嘅,但係到時候唔好怨啲budget乜乜柒柒,唔好屌校方獨斷獨行亂鳩咁嚟就得啦。

政治在於校園,係監察校方、遇見校政荒謬時奮起反抗。
無學生理會,學生嗰一方就會毫無力量,就會不斷被班染紅校監搶走屬於學生嘅嘢。

但係,當見到今年四大莊之一因為少數人嘅私德而分崩離析,突然覺得好絕望。
上得一支咁chur嘅莊,點解咁快遺忘咗當初嘅信念,甘願變成當權者手中嘅武器?
連自己都捍衛唔到,仲點幫其他學生捍衛校園嘅公義?
學校係社會嘅縮影,呢句話真係講得一啲都冇錯。
城大同香港,真係一模一樣,一模一樣嘅病態同痴線。

或者,呢個就係社會嘅現實,一個由一班為私利出賣靈魂嘅當權者同一大班活喺自己世界嘅普通人組成嘅社會。
金玉其外敗絮其中,係我對城大嘅唯一評價。