一星期前，我曾經對一個鐘意嘅女仔許下一個承諾。
「一星期之內，我幫你忘記前度」我堅定地說。
因為一個突如其來嘅念頭，一個衝口而出嘅說話，一個似是疑非嘅時機，造就一星期內所發生嘅事。
一直以來，我都有個青梅竹馬嘅朋友，佢叫阿螢。呢個年頭應該好少人再講「青梅竹馬」呢個詞語，因為喺大多數人眼中，男女之間好難保持到一個純友誼關係，特別對於男仔。喺阿螢眼中，可能真係當我係一個好朋友，但喺我眼中，阿螢就係我唯一，雖然佢有男朋友，但我仍然甘願做一隻小小嘅兵仔，一直陪伴住佢。
呢晚，阿螢約咗我去尖沙咀海旁傾計，我岩岩喺電話之中聽到佢把沙啞嘅聲音，我就知道佢出現咗問題。
「我同男朋友分咗手。」阿螢呆呆望住大海，淡淡地說出。喊咗一大輪，佢都開始平伏落嚟。
海風吹來，空氣之中帶點霧氣，有種黏點糊糊嘅感覺，感覺唔係太舒服。我聽完阿螢分手消息，內心出現一個唔應該出現嘅暗爽，佢地分手即係代表我仲有機會可以同佢一齊，但見到雙眼通紅嘅阿螢，又唔忍心見到佢咁痛苦嘅樣，內心矛盾不斷地掙扎，而且我唔係好識得安慰一個剛分手嘅人，只能夠默默地聆聽著。
「阿明，你有冇試過鐘意人而對方係唔鐘意你?」阿螢突然將問題轉移喺我身上。
呢個問題問得好，問得妙。如果呢題係DSE考試題目，我一定可以拎滿分。我鐘意嘅人就係你，同樣地，你無選擇到我，而選擇咗隔離班嘅男仔。
「試過。」我說。
阿螢好奇地望著我，然後問:「真係架?你鐘意過邊個?無聽你講過嘅?」
「都好耐嘅事。你問嚟做咩?」我盡快轉移返個話題。
「如果你試過，既然對方唔屬於你，你點樣放低對方? 呢刻，我好想即刻放低我前度，唔想再因為佢而影響我生活。」阿螢似乎意識到再傷心落去都無補於事，唯一出路就係放低對方，重新過住新嘅生活。
我好開心阿螢會有咁嘅想法，但知易難行，感情嘅野唔係話一句放低就可以放低，就正如我一直都想將阿螢放低，我都無辦法做到。
我地兩個沉默地望住前方，望住一架接一架嘅船喺我地眼前駛過，我無回答到佢問題，阿螢亦都無追問，因為世上根本無一種快捷方法可以即刻將對方忘記。
丫，快捷方法係有。我腦海出現了一個念頭。
「一星期，你比一星期時間我。」我急不及待地說。
「一星期?比一星期你做咩?」
「一星期之內，我幫你忘記你前度。呢一星期，你要做我女朋友，我相信接住落嚟嘅日子，我所做嘅野會幫到你忘記前度。」
好多年前阿螢仲未拍拖時侯，我就已經想向佢表白，但怕羞怕事嘅我一直都拖住拖住唔敢講，最後眼白白望住阿螢離開我。估唔到呢一刻，我竟然可以咁大膽，咁認真地講出呢番說話，大概我心底裡知道再唔好好把握呢個機會追阿螢，歷史只會重覆，我同阿螢關係永遠都只會係好朋友。
阿螢起初帶住充滿疑問嘅眼神望住我，然後慢慢露出笑容，說出一個我等咗好多年嘅說話。
「好呀，由呢一秒開始，我就係你女朋友。」
本來我心跳得好快，當聽到佢呢番說話，剎那間我腦海一片空白，然後我都開始露出怕羞笑容，不斷微笑地點頭。阿螢即刻笑我臉紅，我呢刻覺得個身好熱，唯有檸轉臉避開佢視線，而佢就不斷捉住我叫我望佢，我地兩個係海旁中拉拉扯扯，睇到佢笑返，似乎呢個係一個好開始。
拍拖第一日
今日一起身張開眼嗰一刻，我腦海第一個諗嘅人就係阿螢，好想好想見到佢，但今日係星期日唔洗返學，攪到我好想快啲完結呢一日。咪住，我唔應該咁諗，呢一星期內我唔可以咩都唔做。
琴晚我提出拍拖一星期係因為我覺得如果呢一星期我喺阿螢心目中地位有所提升，又或者我呢個星期做啲去感動佢，令佢接受我，咁佢心目中嘅前度影像自自然然就會慢慢消失，咁樣我就可以幫佢忘記前度。
同時間，我要求唔係半年，唔係一年，點解要一星期?因為一星期後就係聖誕節，我希望一星期後，我可以用一個真正男朋友身份同佢慶祝。
我即刻拎起手機Whatsapp佢，我望住手機螢幕，慢慢打上
" BB豬，起身未呀? 我好掛住你呀!"
我吞一吞口水，會唔會好鬼骨痺呢? 佢睇完會唔會想嘔!? 平時同佢傾計大家都係粗聲粗氣，呢家打呢啲肉麻野真係......令我遲遲唔敢Send出去比佢。
唔得，我係佢男朋友，講呢啲說話係正常!無錯!係正常! 於是我大膽地Send出去。嗚呀!好似好無臉呀!
轉眼間，阿螢覆返我。
佢首先回咗一個非常驚訝嘅emoji樣，然後覆我
" 邊個係你BB豬......"
我呆呆望住手機個螢幕，內心沉咗一沉，佢係接受唔到定係唔記得咗我地琴日個約定? 呢刻真係想搵個地方收埋自己一世算，真心覺得自己好柒。琴晚仲開心咗好耐，唉!原來沒有，從來都沒有，纏綿邂逅完全虛構......我都係扮哂野話講笑算。
正當我想覆佢時候，阿螢又覆咗我。
" 我係你嘅BB，唔係豬囉! 我都好掛住你!"
嗚呀!我個心情簡直就係坐過山車一樣!個衰妹咁玩我!差啲喊出嚟。呢家佢咁講，姐係琴晚個約定唔係假。
我按佢Whatsapp 頭像嚟睇，見到佢個笑容，我就諗......我唔應該喺到自High，佢答應做我一星期女朋友唔係亂嚟，而係佢真心想忘記前度，同埋信得過我先會咁做。
嗯，我要努力啲先得。之後我就開始瘋狂同佢Whatsapp到夜晚，瘋狂講一啲曖味說話，起初大家都好坦白話感覺怪怪地但又好好笑，但我地都唔理了，總之我地開心就得。
拍拖第二日
今日係星期一，我從來都無咁想返學，我好想快啲返到學校見到佢!所以今日我勁早就起身，勁早執正一下自己就出門!因為今日我約咗阿螢一齊返學，雖然佢落車位置離學校只有十分鐘路程，但我都享受同佢行呢十分鐘。
但當我見到佢時候，發現佢雙眼依然通紅，似乎岩岩喊過嚟。
「你無事呀嘛?」我擔心地問。
阿螢搖搖頭，示意無事。我地兩個一直沉默住行返學，我不時都望一望佢究竟咩事，再望一望遠處嘅學校，大概佢應該唔想返學校見到佢個前度，佢地兩個係同班同學，根本就無得避，呢點亦都係我好在意嘅地方。要忘記一個人，第一步先要離開佢個圈子，盡量將對方所有野全部無視，否則阿螢就算點努力將佢同前度嘅回憶收埋，但每次返學見到面，腦海回憶就會浮現返。
唉，本來今朝早諗住問佢我地之間嘅關係好唔好話比人知，雖然大家都有共識係假，但如果我地變返之前關係喺學校相處，咁呢五日我只可以靠Whatsapp或者放學時間同佢以情侶方式相處，對我諗嘅計劃有啲出入。
但呢個時候問佢會唔會影響到佢心情，又或者佢根本就無認真過，只係我諗得太多，做得太多?
「做咩唔講野嘅? 男朋友。」阿螢似乎都留意到我情緒。但我聽到佢最後三隻字，我又有啲暗爽。
「無呀，諗緊一陣Lunch食咩之嘛。」我隨意作咗個原因。
「咁都好諗? 哈，低B。」說罷，我地兩個就入到學校，各自返返自己班房。
我望住佢背影，估唔到我地假拍拖第二日，我就已經同佢講咗一個大話。
今日上堂唔係好專心到，阿螢有煩惱而搵我，估唔到我自製咗個煩惱比自己，得返五日，我真係可以消除阿螢個前度，我將個地位提升? 真係可以咩? 唉，長痛不如短痛，感情嘅野唔可以拎嚟玩，咩假拍拖.....呢啲野一認真便輸了，我諗阿螢都應該講下，邊會認真。
午膳鐘聲響起，按慣例我都會同班Friend一齊出去食，本來都無咩特別，但今日阿螢竟然企喺我地班房門口等我。
佢嘅舉動，引來好多人起哄，不斷笑我:「得喇!食女得喇!唔洗食飯架喇!」
我同阿螢慢慢離開學校，我就問:「做咩同我一齊食嘅?」
阿螢望住我惡惡地咁講:「做咩? 唔想見到我呀? 咁我走囉!」
「唔係唔係唔係!我純粹問下姐!」我即刻哄返佢。
阿螢嘆了一口氣，拍一拍我膊頭:「我都知你無咩拍拖經驗架喇! 呢家等姐姐教下你喇!男朋友!」
「車!我洗你教!」接著我大膽地拖住佢隻手行。佢無縮，姐係佢接受呢個進一步舉動，咁又係，拍拖.....拖手應該係好正常丫?
冷風迎面吹來，過往呢條路我一直同班Friend屌哂鬼話好凍。但呢刻，我竟然完全無凍嘅感覺，反而仲有啲溫暖，阿螢隻手好暖，就好似拎住個暖蛋喺手一樣咁溫暖。
我望一望佢，佢係笑緊。
拍拖第三日
今日我拎咗個結他返學，好早就同班Friend夾定一陣嘅驚喜。佢地知我目的後，都問我係咪同阿螢拍拖，我都唔知點答佢，唯有含糊咁回應。但眼見班死黨為我有拖拍而真心為我高興，我反而有種呃佢地嘅感覺，內心有啲唔好受，但唔理了。
中午時候，阿螢照舊等埋我一齊出去食。但今次我好耐都無出去，於是佢就入班房搵我，當佢入嚟後，只見我拎住個結他，身邊幾個朋友企喺我身旁，然後我說:「首歌送比你。Westlife嘅My Love!」
呢下舉動又引來全班起哄，連隔離班嘅人都係走廊食花生睇。
「An empty street, an empty houseA hole inside my heart~I'm all alone, the rooms are getting smaller」我開頭認真地唱，但當唱到去 " Where the skies are blue " 本來下一句係 to see you once again, my love，但因為To see you once again 同 屎係黃色嘅 呢句好似，我地就跟住唱 ~ 屎係黃色嘅~~」
呢下終於引到佢笑，同時身邊食花生嘅人都跟住我地一齊唱
" Where the skies are blue~ 屎係黃色嘅!My love~~」
一片起哄聲之下結束呢場驚喜，呢下亦係我人生之中最感到青春嘅一次，如果阿螢真係我女朋友就好。
「做咩無喇喇唱歌比我聽!仲要唱到咁核突!」阿螢笑問。
「咩核突呀!情歌嚟架!」
「係咁唱屎係黃色囉!你要唱嘅情歌比我聽，就認真唱一隻比我聽!」阿螢帶點命令口吻。
「好!我應承你，搵日唱首情歌你聽。」
呢個係我對阿螢第二個承諾。
放學，我約咗阿螢一齊放學行商場，但我要補課所以一直留到好晏，我本來以為佢應該走咗，但都照行去佢班房睇下。
點知比我見到佢同佢前度一齊喺班房入面，我本能反應即刻縮返後唔比佢地見。
點解我要避? 同埋佢地喺到做緊咩?
「個男仔係咪你男朋友?」前度問。
佢所指嘅男仔係咪講緊我?
「出聲呀答我喇!又一齊返學，又一齊出去食，今日仲唱埋歌比你聽!至威係你喇!」
「......」阿螢一直沉默住，但我隱若之中聽到佢有點嗚咽，應該又喊緊。
「同你分手唔夠一日，你就同人拍拖，喂!小姐你啲眼淚假架? 吓? 呢下玩報復呀? 我出面有女人，你即刻搵返個男人激我呀?」
前度呢句說話一下子傳入我腦海入面。報復? 激佢? 係喎，阿螢咁爽手答應而且咁高調，可能真係想搵我嚟激佢.....根本就無諗過認真看待呢段關係。
「喊夠未? 你答我一句，你係唔係同佢拍拖，係定唔係?」前度再逼阿螢說。
「答呀!係定唔係呀!」前度咆哮地說。
我企喺班房門外，緊握拳頭地等待佢阿螢嘅回應，呢個回應對我同對佢嚟講係非常重要。
「我同佢......」阿螢帶住沙啞嘅聲音慢慢地回應。
「喊夠未? 你答我一句，你係唔係同佢拍拖，係定唔係?」前度再逼阿螢說。
「答呀!係定唔係呀!」前度咆哮地說。
我企喺班房門外，緊握拳頭地等待佢阿螢嘅回應。
「我同佢......」阿螢帶住沙啞嘅聲音慢慢地回應。
突然，遠處出現咗我地班嘅同學，佢地見我企喺阿螢班房門口，成班即刻又唱返首Westlife嘅My Love!
" 阿明! Where the skies are blue~ 屎係黃色嘅! My love~~ "
我一時分咗心，聽唔到阿螢個答案係咩，正當我想專注返時候，班同學已經喺我身旁同時拉咗我去班房門口話睇下阿螢喺唔喺到。只見阿螢同佢前度望住我地，呢刻我更清楚望到阿螢雙眼係通紅，而佢即刻抹掉眼淚，低著頭行去自己座位拎書包跟我走。
我望一望佢前度，佢亦都以一副不屑嘅眼神望住我，我都唔理得咁多，就拉咗阿螢走。班同學仔唔知頭唔知路仲喺到起哄送別我地，不過咁仲好，狠狠咁喺佢前度面前落佢面。
離開學校後，我地一路沉默地行，最後我忍唔住問佢
「頭先你......」我問都未問完，佢就低著頭輕輕揮一揮手，示意我唔好問。
個傻妹又喊了。
究竟你呢幾日你喊咗幾多次? 究竟你嘅眼淚係為咩而流? 究竟我應該點做先可以幫你忘記前度?
不知不覺到咗巴士站，佢一言不發咁望住馬路等待巴士，而我亦靜靜地企喺佢身旁，呢刻我感到一種莫名嘅無力感同失落。
「拜拜。」佢拋低呢兩隻字後就上咗車了。
望住架巴士慢慢遠離我視線，我不禁嘆了一口氣。
晚上，我攤喺床到諗今日阿螢個回應究竟係咩呢? 係咪正如佢前度所講同我一齊係為咗激佢? 但如果真係咁，證明阿螢仲對前度仲有餘情，口中所講嘅想忘記前度都係反話。而且佢前度講得岩，分手唔夠幾日，就同我高調咁樣一齊，身邊嘅人點睇阿螢? 無理由要阿螢背負住呢啲負面評價......阿螢都應該意識到呢個問題，究竟係咩原因令到阿螢寧願受人指罵都甘願同我高調?
真係單純配合我個計劃忘記佢前度? 定係借我嚟激佢前度想佢緊張? 定係......
好亂。我完全猜唔透阿螢心底究竟想點，腦海不斷閃出佢當我係水泡嘅念頭，令我心底有種唔甘心同激憤嘅感覺，但我知道我唔應該咁諗......一星期限期係我提出，如今阿螢配合，我點可以怪佢?
正當我思緒充斥住矛盾同混亂之際，Whatsapp響起了，係阿螢。
" 瞓咗未? Sorry，今日我又...... "
我望住個Whatsapp，突然有種氣餒嘅感覺湧現，呢刻真係唔想應佢任何野。於是，就抱頭入睡，咩都唔想理了。
拍拖第四日
琴晚瞓得比較差，一閉上眼就諗起阿螢同佢前度嘅畫面，接著內心就有種窒息感覺，完全唔好受。
起床拎起手機睇，見到阿螢琴晚仲Send咗個Whatsapp嚟。
" 見你無應......應該瞓咗......咁聽日仲一唔一齊返學? 早抖喇.....^^" "
唉
我不自覺咁按返佢whatsapp頭像嚟睇，實在唔忍心再見佢傷心落去。根本問題就出自於我身上，我唔應該諗咁多，我呢家只可以做嘅就係利用埋剩返嘅日子去幫佢忘記前度，而唔係覺得佢放唔低前度而離棄佢。
我好早就喺巴士站等佢，佢見到我時都好驚訝。
「咦?你喺到等我呀?」阿螢面露有點喜悅，佢見到我有種開心嘅感覺?
我伸出隻手示意叫佢拖住我，然後說:「嗯，我地一齊返學。」
阿螢望住我隻手，再望下周圍都係我地學校嘅人，就算係情侶都未必喺呢個環境之下拖手，而且仲會撞到其他老師，佢應該估唔到我竟然會大膽到咁。
但我在意嘅係，佢係猶豫周圍嘅目光，定係如何進一步界定我地之間嘅關係。
2秒.....3秒.....4秒......5秒......
我收返隻手，然後轉身行:「行喇，就遲到。」
接著我地又係沉默地行返學校，呢個沉默畫面唔同往日，而係帶住一股死寂氣氛，我地兩個都各有各想法，各有各有唔開心嘅畫面充斥住整個人。
午飯時候，阿螢無再喺班房門口等我了。我諗大概我今早個舉動令佢意識到我地係時侯終結呢段假拍拖。
放學了
學校聽日舉行聖誕聯歡會，派咗我去買可樂返嚟。我一出班房，就見到阿螢等緊我。
「走得喇?」佢問。
「你唔係一直喺到等我呀? 我要準備聽日啲野，你做咩唔問我?」如果我唔行出去，佢真係喺到一直等嗎?
「今日中午我要去教員室交啲野，返嚟嗰陣你已經走咗。同埋我Whatsapp你......你都唔會應我，至少琴晚到呢家你都未覆我。」阿螢說。
嗰刻，我大概明白了一啲野。我好想即刻將我眼前嘅阿螢一手抱入懷，原來佢一直都等緊我，一直都無放棄呢段假拍拖關係。
我真係好內疚。
「做咩唔出聲呀?」阿螢輕輕篤一篤我個肚。
「我仲要出去買可樂返嚟，你趕唔趕住返屋企? 唔趕嘅就陪我去買......」
阿螢一手拖住我，笑說:「好呀，男朋友叫到我一定陪架。」我見佢拖住我，本能反應即刻望下周圍有冇人見到，真係好驚比老師嗰啲見到。
「原來今朝早你係衝動嘅，呵呵。」阿螢見我咁緊張，就拎咗我今朝早好勇咁叫佢拖住我嘅事黎笑我。
我真係完全敗喺你手上。
由出去買可樂到返學校期間，我地都好開心咁傾計，講下聖誕有咩做，講下嚟緊DSE點溫書，講下將來如果升到大學時候一定要玩咩......似乎好多好多未來嘅野等我地去實現，只係到時我地係用咩身份去實現。
雖然我地話題無提到前度，但已經唔緊要，至少我地兩個都享受緊呢段時光。
拍拖第五日
今日係學校聖誕聯歡會，亦都係我地中學生涯最後一個聖誕聯歡會，大家都好享受演出最後一個班會表演。
但我最估唔到嘅係，佢前度竟然有份參加歌唱比賽，仲講咗一啲好爆嘅說話。
「呢首歌係我求咗評審好耐先肯比我轉歌，我希望可以藉著呢首歌送比一個人。呢段日子我明白到咩叫做失去咗先會珍惜嘅道理，原來我唔可以無咗你，呢首歌，係送比你，前度。」阿螢前度喺禮堂當住全校師生面前講呢啲咁嘅野，而且仲要唱 "唯獨你是不可取替 "，雖然我睇唔到阿螢有咩反應，但如果我係女仔嘅話，我一定比佢呢種『型』深深感動到......更何況同佢一齊過嘅阿螢?
我相信我地班同埋佢地班嘅同學仔都知道......呢首歌佢係送比阿螢。身邊嘅同學仔都竊竊私語咁喺到講究竟我個身份咩，我地究竟係咩關係?
各位，對唔住。其實我地係假拍拖，我同阿螢根本咩都唔係，我浪費咗你地真誠嘅祝福，對唔住。
當前度演唱完感動嘅歌後，得到全場人嘅掌聲，仲有人大叫 " 何潔螢 "
此時此刻，我仲可以做啲咩?
放學後，阿螢要去補習，所以今日除咗朝早見過面後，我地就無見面了。
晚上。
我膽粗粗咁Send咗個Whatsapp比佢
" 聽日平安夜，有野做嗎? 不如我地一齊出去拍拖呀~~
畢竟我仲係佢男朋友，我強調住 "拍拖" " BB" 係想佢都記低我地呢段關係。我唔想因為今日佢前度所做嘅野而又影響咗我地兩個。
但係
阿螢回覆 " 唔得呀，聽日我有野做。不如後日丫，後日我同你出丫!」
都好，可能佢真係有野做。至少佢都肯留返後日比我，都叫有啲安慰。咦.....佢留咗最重要第七日比我，會唔會有所暗示呢?
心裡不禁有點興奮起來，似乎邪不能勝正，今日前度所做嘅野應該打動唔到佢!
嗚呀!!!!!!!!!!!!!!!我得咗呀!!!!!!!!!!
呢晚，我上哂高登問人，查哂Google，好好計劃我地最後一日嘅行程，務求將最完美嘅行程送比我同佢。
拍拖第六日
平安夜，由於阿螢有事做，我都廢事喺屋企做毒撚，就同班Friend出旺角打邊爐。
今日天氣好凍，但旺角各街頭都好熱，因為聚咗好多人喺到『鳩嗚』，自佔領行動被清場後，旺角就持續有班鳩嗚團喺到不時同警察發生衝突。
「企埋一邊呀!!!走呀!!!唔好聚喺到我呀!!!」一班兇狠嘅警察不斷對住我地咆哮。但事實上，我地只係經過條路，完全無意欲同警察對抗，但已經比佢地惡言對待。
突然間，我見到對面馬路封鎖線有對男女好面善，我個心即時離咗一離，我即刻捉住身邊嘅同學仔問
「你睇下對面，係唔係阿螢?」我緊張地問。
我朋友望一望，然後說:「咦係喎!係阿螢喎!佢仲同佢之前條仔一齊嘅?」
唔係化......阿螢口中所講有事做就係同佢前度一齊? 點解.....會咁嘅? 佢地復合咗? 就係因為琴日嗰首歌? 就係因為一首歌就將佢地復合返? 阿螢......你點解揀返佢?
我一時之間情緒有點失控，我不斷推開眼前人群，好想走去對面馬路捉住阿螢嚟問。
警察見我行咁前，即時大罵:「退後呀!我叫你退後呀!聽唔聽到丫!係咪想拉呀!」
我示意我要過對面，但佢無理到我，不斷將我大大力推向後面，我突然有點火遮眼，竟然大大力推返佢出去，警察見到後即刻三四個人行前將我壓去鋪頭道閘，此時身邊各人都大叫起哄，繼而向警察群衝去，我朋友即刻將我拉返後，衝突聲此起彼落，而我在意嘅係對面馬路嘅阿螢......
拍拖第七日，亦是我地約定假拍拖一星期嘅最後一日。
按原本約好，阿螢今晚係同我出街渡過，雖然我受到好大打擊，但我仍然撐落去，完成咗一個完美嘅行程，今晚我一定可以感動到阿螢，同埋要求佢做我真正女朋友，我唔理佢前度呢家同佢係點，我只需要做好自己本份就夠。
「你額頭咩事? 腫咗嘅?」 阿螢指住我傷口說，呢個傷口正正就係班警察所整傷。但我點講得出口，唔通話我到你同前度一齊攪到我比班警察暴力對待......於是就求其話撞到咁就算。
我帶咗阿螢去咗一間好出名嘅高級德國餐廳，以我地仲係學生嚟講，呢度已經對我地係好高級了，我都動用咗我好多零用錢嚟好好喺呢晚消費。
我原本以為阿螢第一次嚟呢啲地方都應該會感到興奮。但係佢個樣話比我知係幾咁冷淡，而且好似好多心事。
我就盡量搵話題同佢傾，希望改善下呢個沉寂氣氛。我說:「係呢，你有冇睇孔明啲故仔呀? 佢個『失蹤』故仔拖咗好耐都未寫囉!懶佢到死!」
阿螢無回應，只係呆呆住眼前嘅食物。
我再搵話題說:「丫......你估下鳩嗚團仲可以Keep幾耐呀拿? 呢排都幾多衝突!」
阿螢淡淡地回應:「唔知呀......」
我實在有點無力感，我大概都估到我地個結局係點。
於是我就講咗一句:「你係咪掛住佢呀?」
阿螢雙眼即刻有返神，然後望住我說:「吓?」
「琴晚我見到你同佢一齊，你地係咪復合咗?」我勇敢地問。
「我唔知......」
「呢啲野點會唔知......就算你唔知，你身邊嘅人都感受到。」
「你感受到啲咩?」
「我感受到你仲係鐘意佢，你放唔低佢，你想同返佢一齊，係咪?」
此時，阿螢低著頭，無回應到我。而我都已經無咩力氣再講落去，即時身旁有好多人大叫 "merry christmas " 顯得非常快樂，唯獨我地兩個一直沉默住。
沉默咗一段時間後，阿螢終於忍唔住開口問:「佢叫我今晚陪佢。」
「嗯......咁你可以去搵佢。」
「但我約咗你先......」
呢句說話狠狠咁插進我心，原來佢一直擔心猶豫唔係選擇緊邊個，而係擔心約咗我後失約而唔敢講。
嘿.....丫! 前度呀前度呀，你真係勁，分手又係你，復合又係你，完全將阿螢掌握喺手，出面有女人都可以得到阿螢原諒，原來一首歌就可以將阿螢追返返嚟，前度呀前度呀，你究竟有咩魔力可以做到咁?
雖然我內心已經流緊眼淚，但我仍然強裝歡笑:「傻喇!!!有咩所謂呀!喂!你要去就快呀!我可以去阿健個Party到玩呀!你快啲去啦!」
「阿健個Party? 佢今日攪Party?」阿螢問。
「係呀!我今晚真係諗唔到有咩可以同你去做，我都係諗住帶你去阿健屋企玩咋!既然你有節目，梗係同佢去喇!唔洗理我喎!」我一口氣將無數個大話一次過講哂出嚟。
「真係?」阿螢仍然問。
「係呀!走喇!快啲喇!」
阿螢最後講咗一聲多謝就走了。
我獨自一人走到去尖沙咀海旁，一星期前我就喺到同阿螢結下承諾，一星期後只剩返我一個人喺到。
呢一星期，我明白到一樣野
『對方係會因為鐘意你而感動，而唔會因為感動而鐘意你。』
阿螢內心仲鐘意緊前度，所以前度為佢唱一首歌就已經好感動。而我，即使我做好多好多感動嘅事去追阿螢，佢都唔會因為感動而選擇我。
此時，Whatsapp響起了，係阿螢。
" 頭先我一直都講唔出口，我想講，我男朋友唔想我再同你聯絡，我都唔想佢再誤會我地兩個。Sorry，感激呢一星期你為我做嘅一切，多謝你。 "
我緊緊地握緊部手機，一直強忍住嘅淚水終於忍唔住流下了
一星期之前，我答應過會幫你忘記前度
誰知
一星期之內，我幫你同前度復合了
而且
一星期之後，令我失去一個對我好重要嘅人
真諷刺
如果一段關係其中一個最大敵人係時間，我就會話一段關係其中一個最大敵人就係前度
前度
你好野。
《完》
